AQSH prezidenti Jo Bayden lavozimiga kirishganidan buyon 228 kun ta’tilda bo‘lgan. Bu haqda Respublikachilar partiyasi Twitter sahifasida aytiladi, deb yozadi “RBK”.
“Bugun faqat shu yil hisobidan Jo Bayden ta’tilining 93-kuni. Lavozimiga kirishganidan buyon Bayden 228 kun ta’tilda bo‘lgan”, — deyiladi xabarda.
Bayden 2021-yil 20-yanvarda prezidentlik lavozimiga kirishgan. Shu tariqa u 19 oy yoki qariyb 580 kundan buyon davlat rahbari lavozimini egallab turibdi.
CBS telekanalining Oq uy faoliyatini yoritib boruvchi sobiq muxbiri Mark Nollerning hisob-kitoblariga ko‘ra, butun prezidentligi davomida Bayden Delaver shtatida 150 kun davomida ta’tilda bo‘lgan. AQSHning 45-prezidenti Donald Tramp esa butun prezidentligi davrida 132 kunni ta’tilda o‘tkazgan. 44-prezident Barak Obama Baydendan ham, Trampdan ham, kichik Bushdan ham kamroq dam olgan — 38 kun. Kichik Jorj Bush 100 kun davomida ta’tilda bo‘lgan.
Bayden so‘nggi marta 10-avgust kuni ta’tilga chiqqan va oilasi bilan Janubiy Karolina shtatidagi Kiava orolida bir hafta dam olgan. Prezident ta’tilini bir kunga to‘xtatib turishga majbur bo‘lgan: 16-avgust kuni Oq uyga qaytib, inflyatsiya qarshi kurash to‘g‘risidagi qonunni imzolagan.
Ta’tilga chiqishidan oldin AQSH prezidenti ikki hafta davomida COVID-19 tufayli karantinda bo‘lgan, ammo uydan ishlashda davom etgan. U kasallikni yengil shaklda o‘tkazib, 7-avgust kuni karantindan chiqqan.
Izoh (0)