АҚШ президенти Жо Байден лавозимига киришганидан буён 228 кун таътилда бўлган. Бу ҳақда Республикачилар партияси Twitter саҳифасида айтилади, деб ёзади «РБК».
«Бугун фақат шу йил ҳисобидан Жо Байден таътилининг 93-куни. Лавозимига киришганидан буён Байден 228 кун таътилда бўлган», — дейилади хабарда.
Байден 2021 йил 20 январда президентлик лавозимига киришган. Шу тариқа у 19 ой ёки қарийб 580 кундан буён давлат раҳбари лавозимини эгаллаб турибди.
CBS телеканалининг Оқ уй фаолиятини ёритиб борувчи собиқ мухбири Марк Ноллернинг ҳисоб-китобларига кўра, бутун президентлиги давомида Байден Делавер штатида 150 кун давомида таътилда бўлган. АҚШнинг 45-президенти Дональд Трамп эса бутун президентлиги даврида 132 кунни таътилда ўтказган. 44-президент Барак Обама Байдендан ҳам, Трампдан ҳам, кичик Бушдан ҳам камроқ дам олган — 38 кун. Кичик Жорж Буш 100 кун давомида таътилда бўлган.
Байден сўнгги марта 10 август куни таътилга чиққан ва оиласи билан Жанубий Каролина штатидаги Киава оролида бир ҳафта дам олган. Президент таътилини бир кунга тўхтатиб туришга мажбур бўлган: 16 август куни Оқ уйга қайтиб, инфляция қарши кураш тўғрисидаги қонунни имзолаган.
Таътилга чиқишидан олдин АҚШ президенти икки ҳафта давомида COVID-19 туфайли карантинда бўлган, аммо уйдан ишлашда давом этган. У касалликни енгил шаклда ўтказиб, 7 август куни карантиндан чиққан.
Изоҳ (0)