22-avgust kuni “O‘zbekgidroenergo” aksiyadorlik jamiyati boshqaruvi raisi Abdug‘ani Sanginov boshchiligidagi ijro apparati mas’ullari va Xitoy Xalq Respublikasining Zhejiang Jinlun Electromechanic Co., Ltd. kompaniyasi boshqaruvi raisi kotibi Ouyang Xong rahbarligidagi kompaniya vakillari o‘rtasida uchrashuv bo‘lib o‘tdi. Bu haqda O‘zA xabar qildi.
Qayd etilishicha, Xitoy Xalq Respublikasining gidroenergetika sohasida 60 yildan ortiq tajribaga ega bo‘lgan Zhejiang Jinlun Electromechanic Co., Ltd. kompaniyasi bilan izchil hamkorlikda O‘zbekistonda Markaziy Osiyo mamlakatlarida yagona hisoblangan quvvati 2-15 MVtgacha bo‘lgan gidroagregatlarni ishlab chiqarish faoliyati yo‘lga qo‘yilmoqda. Mazkur xorijiy kompaniya nafaqat respublikaning gidroenergetika sohasi uchun gidroagregatlarni ishlab chiqaradi, balki qo‘shni davlatlar – Qozog‘iston, Qirg‘iziston, Tojikiston, Afg‘oniston va boshqa davlatlar uchun ham gidroagregatlar ishlab chiqaradi.
Zhejiang Jinlun Electromechanic Co., Ltd. kompaniyasi boshqaruvi raisi kotibi Ouyang Xong o‘z so‘zida ushbu hamkorlik memorandumi doirasida samarali ishlar qilinishiga urg‘u bergan.
Yaqinda “O‘zbekgidroenergo” AJ va Hindistonning MACLEC technical project laboratory pvt. LTD kompaniyasi bilan o‘zaro anglashuv memorandumi imzolangan edi. Memorandum import hajmini qisqartirish va mamlakatimizda kichik va mikro GESlar uchun gidroagregatlar “Made in Uzbekistan” milliy brendi asosida ishlab chiqarilishi yo‘lida huquqiy asosdir. Bugun imzolangan hamkorlik memorandumi ham gidroenergetika sohasini rivojlantirishga xizmat qilishi bilan ahamiyatlidir. Mazkur hujjatga asosan endilikda “O‘zbekgidroenergo” AJ Xitoyning Zhejiang Jinlun Electromechanic Co., Ltd. kompaniyasi bilan hamkorlikda har bir loyiha uchun individual va eksklyuziv bo‘lgan gidroagregatlarni loyihalashtiradi. Mazkur gidroagregatlar “O‘zbekgidroenergo” AJning tizim tashkiloti hisoblangan “Suvsanoatmash” AJ zavodida ishlab chiqariladi – dedi “O‘zbekgidroenergo” aksiyadorlik jamiyati bo‘lim boshlig‘i Avazbek Zokirov.Shuningdek, uchrashuvda ushbu hamkorlik yuqori innovatsion texnologik qurilmalarning mamlakat gidroenergetika sohasida ilk bor ishlab chiqarilishi yo‘lga qo‘yilishi mahalliylashtirish doirasida kelgusida moliyaviy sarf-xarajatlarni iqtisod qilishga, sifatli va zamonaviy standartlarga asoslangan agregatlar ishlab chiqarishni o‘zlashtirishda katta imkoniyat yaratishi qayd etilgan.
Izoh (0)