Sirdaryo viloyati Xovos tumanida 20-avgust kuni uyga o‘g‘rilikka tushgan shaxs uni ko‘rib qolgan qizni pichoqlab o‘ldirdi. Bu haqda bosh prokuror matbuot kotibi Hayot Shamsutdinov “Daryo”ga ma’lum qildi.
Qayd etilishicha, 20-avgust kuni soat 04:00 larda noma’lum shaxs Xovos tumani Minor ko‘chasidagi uylarning biriga yashirincha kirib, uyning barcha xonalaridan pul va qimmatbaho buyumlarni izlash jarayonida yotoqxonada yotgan 14 yoshli qizni yuzini ko‘rib qolgani sababli pichoq bilan qasddan o‘ldirgan.
So‘ng pullarni qidirishni davom ettirib, uyning boshqa xonasida namoz o‘qish uchun tayyorgarlik ko‘rayotgan 78 yoshli ayolga pichoq bilan tahdid qilgan holda pullar qayerda ekanini talab qilgan. Biroq ayoldan “pullar yo‘q” degan javobni olgach, hodisa joyidan yashiringan.
Holat yuzasidan Xovos tumani prokuraturasi tomonidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan.
Jinoyatni fosh etish borasida tergov-tezkor guruhi tomonidan olib borilgan tezkor surishtiruv harakatlari davomida ushbu jinoyatni 1997-yilda Namangan viloyatida tug‘ilgan, muqaddam bir necha marotaba sudlangan, oxirgi marotaba 2018-yilda bosqinchilik bilan sudlanib, hozirda manzil koloniyada jazo o‘tayotgan shaxs sodir etgani aniqlangan.
Jinoyat ishi doirasida gumonlanuvchi protsessual tartibda ushlangan. Tergov harakatlari olib borilmoqda.
Izoh (0)