22 август куни «Ўзбекгидроэнерго» акциядорлик жамияти бошқаруви раиси Абдуғани Сангинов бошчилигидаги ижро аппарати масъуллари ва Хитой Халқ Республикасининг Zhejiang Jinlun Electromechanic Co., Ltd. компанияси бошқаруви раиси котиби Оуянг Хонг раҳбарлигидаги компания вакиллари ўртасида учрашув бўлиб ўтди. Бу ҳақда ЎзА хабар қилди.
Қайд этилишича, Хитой Халқ Республикасининг гидроэнергетика соҳасида 60 йилдан ортиқ тажрибага эга бўлган Zhejiang Jinlun Electromechanic Co., Ltd. компанияси билан изчил ҳамкорликда Ўзбекистонда Марказий Осиё мамлакатларида ягона ҳисобланган қуввати 2-15 МВтгача бўлган гидроагрегатларни ишлаб чиқариш фаолияти йўлга қўйилмоқда. Мазкур хорижий компания нафақат республиканинг гидроэнергетика соҳаси учун гидроагрегатларни ишлаб чиқаради, балки қўшни давлатлар – Қозоғистон, Қирғизистон, Тожикистон, Афғонистон ва бошқа давлатлар учун ҳам гидроагрегатлар ишлаб чиқаради.
Zhejiang Jinlun Electromechanic Co., Ltd. компанияси бошқаруви раиси котиби Оуянг Хонг ўз сўзида ушбу ҳамкорлик меморандуми доирасида самарали ишлар қилинишига урғу берган.
Яқинда «Ўзбекгидроэнерго» АЖ ва Ҳиндистоннинг МАCLEC technical project laboratory pvt. LTD компанияси билан ўзаро англашув меморандуми имзоланган эди. Меморандум импорт ҳажмини қисқартириш ва мамлакатимизда кичик ва микро ГЭСлар учун гидроагрегатлар «Маde in Uzbekistan» миллий бренди асосида ишлаб чиқарилиши йўлида ҳуқуқий асосдир. Бугун имзоланган ҳамкорлик меморандуми ҳам гидроэнергетика соҳасини ривожлантиришга хизмат қилиши билан аҳамиятлидир. Мазкур ҳужжатга асосан эндиликда «Ўзбекгидроэнерго» АЖ Хитойнинг Zhejiang Jinlun Electromechanic Co., Ltd. компанияси билан ҳамкорликда ҳар бир лойиҳа учун индивидуал ва эксклюзив бўлган гидроагрегатларни лойиҳалаштиради. Мазкур гидроагрегатлар «Ўзбекгидроэнерго» АЖнинг тизим ташкилоти ҳисобланган «Сувсаноатмаш» АЖ заводида ишлаб чиқарилади – деди «Ўзбекгидроэнерго» акциядорлик жамияти бўлим бошлиғи Авазбек Зокиров.Шунингдек, учрашувда ушбу ҳамкорлик юқори инновацион технологик қурилмаларнинг мамлакат гидроэнергетика соҳасида илк бор ишлаб чиқарилиши йўлга қўйилиши маҳаллийлаштириш доирасида келгусида молиявий сарф-харажатларни иқтисод қилишга, сифатли ва замонавий стандартларга асосланган агрегатлар ишлаб чиқаришни ўзлаштиришда катта имконият яратиши қайд этилган.
Изоҳ (0)