Ijtimoiy tarmoqlarda Afg‘oniston muvaqqat hukumati harbiylari O‘zbekiston bilan chegaradagi Orol Payg‘ambar orolini bosib olgani haqida xabarlar tarqaldi. Davlat xavfsizlik xizmati chegara qo‘shinlari holatga munosabat bildirdi.
Qayd etilishicha, 21-avgust kuni Orol Payg‘ambar oroli hududida (Surxondaryo viloyati) bir guruh Afg‘oniston fuqarolari davlat chegarasini buzib, o‘z qayiqlarida yuqorida qayd etilgan orol tomon bog‘lab turgani ko‘ringan.
Hududga yetib kelgan O‘zbekiston chegara chizig‘i harbiylariga qoidabuzarlar qarshilik ko‘rsatgan.
Olib borilgan tezkor tadbir natijasida O‘zbekiston chegarasini buzganlarning barchasi (jami 24 nafar) shaxsini aniqlash va tergov-tezkor tadbirlarini o‘tkazish maqsadida qo‘lga olingan.
O‘tkazilgan tergov natijasida chegaradagi hodisaga O‘zbekistonning chegara zonasida ko‘p miqdorda o‘sadigan qizilmiya ildizining noqonuniy ravishda olinishi sabab bo‘lgani aniqlangan.
“Ayni paytda Orol Payg‘ambar oroli hududi O‘zbekiston chegara qo‘shinlari bo‘linmalarining to‘liq nazorati ostida”, — deyiladi xabarda.
Izoh (0)