Ijtimoiy tarmoqlarda Toshkent viloyati Yangiyo‘l tumanida yashovchi fuqaro o‘zining og‘iz qismini tikib olib murojaat qilgani, keyinroq uy tomiga chiqib olib, o‘zini pastga tashlamoqchi bo‘lgani aytilgan xabarlar tarqaldi. Viloyat Ichki ishlar bosh boshqarmasi holatga munosabat bildirdi.
Ma’lum qilinishicha, joriy yil 20-avgust kuni Yangiyo‘l tumani “Xalqobod” MFYda yashovchi fuqaro S.T. (1991-yilda tug‘ilgan) ust kiyimlarini yechib, xonadon tomiga chiqqan va o‘zini pastga tashlashini aytib, baqirib atrofdagilarni yig‘gan.
Ushbu voqea joyiga yetib borgan hududiy IIB xodimlari fuqaroni tinchlantirish va undan nima maqsadda bu ishni qilayotgani so‘rab, barchasini qonuniy tartibda hal etilishini bildirgan vaqtida fuqaro IIO xodimlari va atrofdagi shaxslarni turli kurakda turmas so‘zlar bilan haqoratlagan.
Baland ovozda so‘kinib, jamiyatda yurish-turish qoidalarini qasddan mensimasdan ushbu harakatlarini davom ettirgan.
Holat yuzasidan o‘tkazilgan ochiq sud majlisida fuqaro S.T. Ma’muriy javobgarlik to‘g‘risidagi kodeksning 183- (mayda bezorilik) va 194-moddalarida (ichki ishlar organlari xodimining qonuniy talablarini bajarmaslik) ko‘rsatilgan huquqbuzarlikni sodir qilganlikda aybli deb topilgan. Unga nisbatan 10 sutka ma’muriy qamoq jazosi tayinlangan.
Fuqaro sudda ma’lum qilishicha, o‘zini tomdan tashlashiga noma’lum bloger ayol kelib, unga “shantaj qilib, masalangni hal qilib yuribsanmi?” degan so‘zlari turtki bo‘lgan.
Ma’lumot o‘rnida, ushbu shaxs muqaddam jinoyat kodeksining 169- (o‘g‘rilik) va 105-moddalarida (qasddan badanga o‘rtacha og‘ir shikast yetkazish) nazarda tutilgan jinoyatlarni sodir etgani uchun sudlanib, tegishli tartibda chora ko‘rilgan.
Izoh (0)