Ижтимоий тармоқларда Тошкент вилояти Янгийўл туманида яшовчи фуқаро ўзининг оғиз қисмини тикиб олиб мурожаат қилгани, кейинроқ уй томига чиқиб олиб, ўзини пастга ташламоқчи бўлгани айтилган хабарлар тарқалди. Вилоят Ички ишлар бош бошқармаси ҳолатга муносабат билдирди.
Маълум қилинишича, жорий йил 20 август куни Янгийўл тумани «Халқобод» МФЙда яшовчи фуқаро С.Т. (1991 йилда туғилган) уст кийимларини ечиб, хонадон томига чиққан ва ўзини пастга ташлашини айтиб, бақириб атрофдагиларни йиғган.
Ушбу воқеа жойига етиб борган ҳудудий ИИБ ходимлари фуқарони тинчлантириш ва ундан нима мақсадда бу ишни қилаётгани сўраб, барчасини қонуний тартибда ҳал этилишини билдирган вақтида фуқаро ИИО ходимлари ва атрофдаги шахсларни турли куракда турмас сўзлар билан ҳақоратлаган.
Баланд овозда сўкиниб, жамиятда юриш-туриш қоидаларини қасддан менсимасдан ушбу ҳаракатларини давом эттирган.
Ҳолат юзасидан ўтказилган очиқ суд мажлисида фуқаро С.Т. Маъмурий жавобгарлик тўғрисидаги кодекснинг 183- (майда безорилик) ва 194-моддаларида (ички ишлар органлари ходимининг қонуний талабларини бажармаслик) кўрсатилган ҳуқуқбузарликни содир қилганликда айбли деб топилган. Унга нисбатан 10 сутка маъмурий қамоқ жазоси тайинланган.
Фуқаро судда маълум қилишича, ўзини томдан ташлашига номаълум блогер аёл келиб, унга «шантаж қилиб, масалангни ҳал қилиб юрибсанми?» деган сўзлари туртки бўлган.
Маълумот ўрнида, ушбу шахс муқаддам жиноят кодексининг 169- (ўғрилик) ва 105-моддаларида (қасддан баданга ўртача оғир шикаст етказиш) назарда тутилган жиноятларни содир этгани учун судланиб, тегишли тартибда чора кўрилган.
Изоҳ (0)