Германия канцлери Олаф Шольц Россия Украинага бостириб киришидан олдинроқ Россия президенти Владимир Путинга Украина яқин ўн йилликлар ичида НАТО аъзосига айланмаслигига ваъда бергани ҳақида гапириб берди, деб ёзади Meduza.
«НАТО ҳеч қачон Россия учун хавф бўлмаган», — деди Шольц. Унинг сўзларига кўра, Путин билан суҳбат чоғида у Россия президентини Украинанинг аъзолиги масаласида: «Бу яқин 30 йил ичида амалга ошмайди», — деб ишонтирган. Германия канслари НАТО мамлакатлари урушга қадар «Россия хавфсизлиги манфаатлари ташвишини қилмагани» ҳақидаги айбловларни рад этди.
Шольцнинг сўзларига кўра, Путин Европадаги либерал ва очиқ жамиятларни қабул қилишни истамайди ҳамда урушни «мутлақо бемаъни сабаблар» билан бошлаган — масалан, у канцлерга Украина ва Беларусь алоҳида давлатлар сифатида мавжуд бўлмаслиги керак, деган.
Шольц унинг Путин билан суҳбати қачон бўлиб ўтганига аниқлик киритмади. Урушдан аввал улар 2021 йил 21 декабрда телефон орқали гаплашган эди. Ўшанда, Кремль хабарига кўра, Путин Шольцга Россиянинг хавфсизлик кафолатлари бўйича, НАТОни шарққа силжитиш ва мамлакатларга зарбдор қурол-яроғ тизимларини жойлаштиришни истисно қилувчи таклифлари ҳақида гапириб берган. 15 февраль куни Шольц Москвага келиб, Киев билан низони сусайтиришга чақирган. Ундан бир кун аввал эса канцлер Украинада Зеленский билан учрашган. Ўшанда у Украинанинг НАТОга аъзолиги кун тартибида турмаганини, шунинг учун Москва буни катта муҳокамалар мавзусига айлантиргани унга ғалати туюлаётганини айтганди.
Путин аввалроқ Украинани қуролсизлантириш ҳақидаги талаб (Россия ҳарбий операцияси мақсадларидан бири) Россия учун «мутлақо реал бўлган хавф» туфайли юзага келганини, чунки Украина НАТОга қўшилишни режалаштиргани ва ядро қуролига эга бўлиш имконияти ҳақида гапира бошлаганини айтганди. Ҳарбий операция бошланишидан олдинроқ Россия президенти Украинанинг НАТОга аъзо бўлиши ҳарбий низога олиб келиши ҳақида фикр билдирганди, чунки Киев, унинг сўзларига кўра, альянсга қўшилганидан кейин Қримни куч билан қайтариб олишга уринади.
Шольц Украинанинг НАТОга қўшилиши масаласи кун тартибига киритилмаганини аввал ҳам айтган. У, шунингдек, альянс Москва ва Киев ўртасидаги зиддиятга ҳам аралашмаслигини таъкидлаган.
Изоҳ (0)