O‘zbekiston tashqi ishlar vaziri vazifasini bajaruvchi Vladimir Norov 22-avgust kuni kongressmenlar Trent Kelli va Darin Lahuddan iborat AQSH Kongressi Vakillar palatasi delegatsiyasini qabul qildi.
TIV matbuot xizmatining ma’lum qilinishicha, uchrashuv davomida O‘zbekiston—Amerika munosabatlarining bugungi holati va rivojlanish istiqbollari yuzasidan fikr almashildi.
Muloqotda parlamentlararo aloqalarni kengaytirish, siyosiy, savdo-investitsiya, akademik va madaniy-gumanitar sohalardagi muloqotni ikki davlat darajasida ham, kongressmenlar vakili bo‘lgan Missisipi va Illinoys Shtatlari bilan ham chuqurlashtirishga alohida e’tibor qaratildi.
Kongress vakillar palatasidagi “O‘zbekiston bo‘yicha Kokus” faoliyati alohida muhokama qilindi. Uning hamraisi kongressmen Trent Kelli hisoblanadi. Kokus tarkibi O‘zbekiston bilan strategik sheriklikni tizimli rivojlantirishni har tomonlama qo‘llab-quvvatlaydigan istiqbolli amerikalik qonun chiqaruvchilar hisobiga jadal kengayib borayotgani ta’kidlandi.
Ikki tomonlama savdo-investitsiya aloqalarining jadal sur’atlarda o‘sib borayotgani mamnuniyat bilan qayd etildi. Kongressmenlar O‘zbekistonda amalga oshirilayotgan ijtimoiy-iqtisodiy islohotlarni qo‘llab-quvvatlash yuzasidan choralarni ko‘rishga tayyorligini bildirdi.
Uchrashuvda, shuningdek, Afg‘oniston masalasida fikr almashilgan. Tomonlarning ushbu mamlakatdagi murakkab gumanitar vaziyatning oldini olish bo‘yicha o‘zaro hamkorlik qilishga tayyorligini bildirgan.
Ikki tomonlama kun tartibining dolzarb masalalari, shuningdek, mamlakatlarimizning xalqaro tashkilotlar doirasidagi aloqalari ham ko‘rib chiqilgan.
Eslatib o‘tamiz, AQSH Kongressi delegatsiyasi O‘zbekiston—AQSH hamkorligining bugungi holati va istiqbollarini, jumladan, parlamentlararo hamkorlikni kengaytirish masalalarini muhokama qilish uchun 20-avgust kuni Toshkentga kelgandi.
Tashrif davomida delegatsiya Oliy Majlis Senati va Qonunchilik palatasi rahbariyati, shuningdek, respublika vazirlik va idoralarida ikki tomonlama uchrashuvlar o‘tkazadi.
Izoh (0)