Sirdaryo tumanida farzandiga aliment to‘lashdan bosh tortgan ota qamaldi.
Majburiy ijro byurosining Sirdaryo tuman ish yurituvidagi fuqarolik ishlari bo‘yicha Sirdaryo tumanlararo sudining 2015-yil 9-sentabrdagi ijro varaqasiga asosan qarzdor I.B.dan undiruvchi F.X.ning foydasiga 1 nafar farzandining ta’minoti uchun qarzdorning oylik ish haqi va boshqa daromadlaridan ¼ qism miqdorida aliment undirish belgilangan.
Qarzdor ota sud buyrug‘ida zimmasiga yuklatilgan mas’uliyatni bajarmadi. Byuroning Sirdaryo tuman bo‘limi tomonidan I.B. 1 nafar farzandining ta’minoti uchun aliment pullarini o‘z vaqtida to‘lashi bo‘yicha bir necha bor ogohlantirilgan bo‘lsa-da, ota farzandining ta’minotini 21 oy davomida, ya’ni 17 615 380 so‘m aliment pullarini o‘z vaqtida to‘lamadi.
Jinoyat ishlari bo‘yicha Sirdaryo tuman sudining 2022-yil 18-avgustdagi qaroriga asosan fuqaro I.B.ga nisbatan 15 sutka ma’muriy qamoq jazosi tayinlandi.
Bu bilan otaga farzandlarining ta’minoti qonun himoyasida ekani eslatib qo‘yildi.
Izoh (0)