“Navoiy IES” aksiyadorlik jamiyati ishlab chiqilgan issiqlik energiyasini belgilangan narxdan qimmat sotib, tadbirkorlarga zarar yetkazgani ma’lum bo‘ldi. Bu haqda Monopoliyaga qarshi kurashish qo‘mitasi xabar qildi.
Qayd etilishicha, issiqxonalar uchun zarur bo‘lgan issiqlik energiyasini yetkazib berishda monopoliyalar tomonidan tadbirkorlarning manfaatlari buzilayotgani yuzasidan qo‘mitaga ko‘plab murojaatlar kelib tushmoqda.
Jumladan, Navoiy viloyatida 150 gektardan ortiq yer maydoniga issiqxonalar qurilgan. U yerda faoliyat yuritayotgan tadbirkorlarga tabiiy monopoliya subyekti hisoblangan “Navoiy IES” AJ tomonidan ishlab chiqilgan 1 Gkal issiqlik energiyasi belgilangan narxlarda, ya’ni 166,1 ming so‘mdan yetkazib berish o‘rniga o‘rtacha 227,5 ming so‘mdan yoki 37 foizga qimmat narxda yetkazib berilgan. Oqibatda jami 70 dan ortiq tadbirkorlardan qariyb 8 milliard so‘mlik ortiqcha mablag‘ olib kelingan.
Mazkur masala bo‘yicha Monopoliyaga qarshi kurashish qo‘mitasi tomonidan tadbirkorlarning qonuniy manfaatlarini tiklash bo‘yicha ko‘rilgan choralar natijasida asossiz undirilgan mablag‘larni tadbirkorlarga qaytarish bo‘yicha ko‘rsatmalar berilgan.
Qo‘mitaning ushbu qarorlari Navoiy tumanlararo ma’muriy sudi tomonidan qanoatlantirilgan. Bunda tadbirkorlarning manfaatlari himoya qilinishi kutilmoqda.
Izoh (0)