«Навоий ИЭС» акциядорлик жамияти ишлаб чиқилган иссиқлик энергиясини белгиланган нархдан қиммат сотиб, тадбиркорларга зарар етказгани маълум бўлди. Бу ҳақда Монополияга қарши курашиш қўмитаси хабар қилди.
Қайд этилишича, иссиқхоналар учун зарур бўлган иссиқлик энергиясини етказиб беришда монополиялар томонидан тадбиркорларнинг манфаатлари бузилаётгани юзасидан қўмитага кўплаб мурожаатлар келиб тушмоқда.
Жумладан, Навоий вилоятида 150 гектардан ортиқ ер майдонига иссиқхоналар қурилган. У ерда фаолият юритаётган тадбиркорларга табиий монополия субъекти ҳисобланган «Навоий ИЭС» АЖ томонидан ишлаб чиқилган 1 Гкал иссиқлик энергияси белгиланган нархларда, яъни 166,1 минг сўмдан етказиб бериш ўрнига ўртача 227,5 минг сўмдан ёки 37 фоизга қиммат нархда етказиб берилган. Оқибатда жами 70 дан ортиқ тадбиркорлардан қарийб 8 миллиард сўмлик ортиқча маблағ олиб келинган.
Мазкур масала бўйича Монополияга қарши курашиш қўмитаси томонидан тадбиркорларнинг қонуний манфаатларини тиклаш бўйича кўрилган чоралар натижасида асоссиз ундирилган маблағларни тадбиркорларга қайтариш бўйича кўрсатмалар берилган.
Қўмитанинг ушбу қарорлари Навоий туманлараро маъмурий суди томонидан қаноатлантирилган. Бунда тадбиркорларнинг манфаатлари ҳимоя қилиниши кутилмоқда.
Изоҳ (0)