“Real” yarim himoyachisi Kazemironing “Manchester Yunayted”ga o‘tish tafsilotlari ma’lum bo‘ldi.
BBC jurnalisti Saymon Stounning xabariga ko‘ra, agarda muzokaralar ijobiy yakunlansa, mankunianliklar futbolchi uchun “Real”ga 60 million yevro va qo‘shimcha 10 million yevro bonus sifatida to‘lab beradi.
Futbolchi bir yilga uzaytirish huquqi bilan 4 yillik shartnomaga imzo chekadi. Hozircha muzokaralar yakuniga yetgani yo‘q, “qizil iblislar” ushbu transfer amalga oshishiga umid qilmoqda.
Kazemironing o‘zi ham pul uchun emas, shaxsiy va professional sabablarga ko‘ra, ingliz klubi safiga o‘tmoqchi, deya ta’kidlaydi ESPN jurnalisti Fernande Kampush.
Braziliyalik yarim himoyachi “Real” bosh murabbiyi Karlo Anchelotti bilan o‘z kelajagini muhokama qilgan. Futbolchi agarda jamoada qolsa, qanday rol o‘ynashi borasida savollarni o‘rtaga qo‘ygan. Chunki madridliklar yozda Orelyen Tchuameni transferini amalga oshirdi, bu esa Kazemironing jamoadagi roliga ta’sir ko‘rsatadi.
Anchelotti ham braziliyalikni olib qolish variantini ma’qul ko‘rardi, biroq hozirda u har qanday qarorni qabul qilishga tayyor. “Real” ham futbolchi agarda inglizlar safiga o‘tmoqchi bo‘lsa, uning yo‘liga to‘sqinlik qilmasligini bildirgan. Kazemiro “qizil iblislar” bilan shartnoma imzolasa, bu faoliyatidagi eng so‘nggi katta bitim bo‘lishini his qilmoqda.
Avvalroq, “Manchester Yunayted” futbolchini “Liverpul”ga qarshi o‘yinga qadar olib kelmoqchi ekanligi xabar qilingandi.
Izoh (0)