Каземиро «Манчестер Юнайтед»га ўтади. Келишувнинг молиявий тафсилотлари маълум

«Реал» ярим ҳимоячиси Каземиронинг «Манчестер Юнайтед»га ўтиш тафсилотлари маълум бўлди.

BBC журналисти Саймон Стоуннинг хабарига кўра, агарда музокаралар ижобий якунланса, манкунианликлар футболчи учун «Реал»га 60 миллион евро ва қўшимча 10 миллион евро бонус сифатида тўлаб беради.

Футболчи бир йилга узайтириш ҳуқуқи билан 4 йиллик шартномага имзо чекади. Ҳозирча музокаралар якунига етгани йўқ, «қизил иблислар» ушбу трансфер амалга ошишига умид қилмоқда.

Каземиронинг ўзи ҳам пул учун эмас, шахсий ва профессионал сабабларга кўра, инглиз клуби сафига ўтмоқчи, дея таъкидлайди ESPN журналисти Фернанде Кампуш.

Бразилиялик ярим ҳимоячи «Реал» бош мураббийи Карло Анчелотти билан ўз келажагини муҳокама қилган. Футболчи агарда жамоада қолса, қандай рол ўйнаши борасида саволларни ўртага қўйган. Чунки мадридликлар ёзда Орельен Тчуамени трансферини амалга оширди, бу эса Каземиронинг жамоадаги ролига таъсир кўрсатади.

Анчелотти ҳам бразилияликни олиб қолиш вариантини маъқул кўрарди, бироқ ҳозирда у ҳар қандай қарорни қабул қилишга тайёр. «Реал» ҳам футболчи агарда инглизлар сафига ўтмоқчи бўлса, унинг йўлига тўсқинлик қилмаслигини билдирган. Каземиро «қизил иблислар» билан шартнома имзоласа, бу фаолиятидаги энг сўнгги катта битим бўлишини ҳис қилмоқда.

Аввалроқ, «Манчестер Юнайтед» футболчини «Ливерпуль»га қарши ўйинга қадар олиб келмоқчи эканлиги хабар қилинганди.