“Manchester Yunayted” “Real” yarim himoyachisi Kazemiroga jiddiy qiziqish bildirmoqda.
El Chiringuito xabariga ko‘ra, “qizil iblislar” ushbu transferni shanba kuniga qadar rasmiylashtirmoqchi. Klub yaqin orada taklif bilan chiqishi aytilyapti. Madrid jamoasi uni o‘rganib chiqishga tayyor.
“Real” 30 yoshli futbolchini juda qadrlaydi, biroq “Manchester Yunayted” 70 million yevrolik taklif bilan chiqadigan bo‘lsa, muzokaralar stoliga o‘tirishga tayyor, deya xabar qilmoqda El Confidencial.
Ispan jamoasi Kazemironing yoshi, shuningdek, ushbu yozda 80+20 million yevroga sotib olingan Orelyen Tchuamenining transferini inobatga olgan holda taklifga rozi bo‘lishi mumkin.
“Yunayted” braziliyalik futbolchini jamoa uchun kerakli bo‘lishiga ishonmoqda va unga “Real”ga qaraganda ko‘proq maosh to‘lashga tayyor. Kazemiro “Real”da yiliga 7 million yevro maosh oladi.
“Manchester Yunayted” 22-avgust, dushanba kuni “Liverpul”ga qarshi o‘ynaydi. Erik ten Hag jamoasi APL 2-turidan keyin birorta ham ochko to‘play olmay, so‘nggi o‘rinda bormoqda.
Avvalroq “Manchester Yunayted” Kazemiro uchun 50 million funt to‘lashga tayyor ekani xabar qilingandi.
Izoh (0)