Россия Қора денгиз флоти қўмондони ўзгарди, деб ёзади Meduza. Бу ҳақда «РИА Новости Қрим» флотдаги манбаларига таяниб хабар берган.
Янги қўмондон — вице-адмирал Виктор Соколов ҳарбий кенгаш аъзоларига таништирилди, деди агентлик суҳбатдошлари, уларнинг қўшимча қилишича, бош қўмондон уни лавозимга тайинлаш ҳақида буйруқ чиқарган.
«Оммавий тадбир бўлгани йўқ ва, катта эҳтимол билан, бўлмаса ҳам керак, чунки шаҳарда террорчилик хавфининг сариқ даражаси жорий қилинган», — деди улар.
Вазият билан ҳамда шахсан Виктор Соколов билан таниш бўлган агентликнинг яна бир манбаси айтишича, «махсус ҳарбий операция бораётган» бир шароитда ҳеч ким бундай тайинловлар ҳақида оммага эълон қилишга мажбур эмас — бу нормал ҳолат. Соколов, унинг сўзларига кўра, ҳозир «ишларни қабул қилиб олмоқда».
Россия Қора денгиз флотининг расмий вакиллари қўмондон алмашгани ҳақидаги хабарларга изоҳ берганича йўқ. Президентнинг флотга янги қўмондон тайинлаш ҳақидаги буйруғи очиқ манбаларга жойлаштирилгани йўқ.
Агар Виктор Соколовнинг тайинлангани ҳақидаги маълумот тасдиқланса, у Россия Қора денгиз флоти қўмондони лавозимида Игорь Осиповнинг ўрнини эгаллаган бўлади.
Осипов 2019 йил мартида Россия президенти фармони билан Қора денгиз флоти қўмондони этиб тайинланган эди.
2022 йил апрелида «Москва» крейсери ҳалокатга учраганидан кейин Украина ОАВларида Осипов суриштирув олиб борилаётган пайтда лавозимидан четлатилгани ва ҳатто ҳибсга олингани ҳақидаги маълумотлар пайдо бўлган эди. Ушбу версия тарафдорлари қайд этишича, Қора денгиз флоти қўмондони май ойида Севастополда Ғалаба куни Қора денгиз флоти куни шарафига уюштирилган байрам тантаналарида қатнашмаган. Аммо 19 июнь куни Осипов оммага кўриниш берган: Севастополдаги Нахимов билим юртидаги битирув маросимига келган.
Изоҳ (0)