Oliy Majlis Qonunchilik palatasi Mehnat va ijtimoiy masalalar qo‘mitasi tomonidan 18-avgust kuni Qonunchilik muammolari va parlament tadqiqotlari instituti bilan hamkorlikda “Mamlakatimizda mahkumlarning huquqlari va qonuniy manfaatlarini ishonchli himoya qilish borasidagi qonunchilikni takomillashtirish masalalari” mavzusida seminar o‘tkazildi.
Qayd etilishicha, seminarda mamlakatda mahkumlar uchun qulay shart-sharoitlar yaratish, ularning huquq va erkinliklarini ta’minlash borasida olib borilayotgan ishlar, bu boradagi xalqaro tajriba hamda “O‘zbekiston Respublikasining ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan o‘zgartish va qo‘shimchalar kiritish to‘g‘risida”gi qonun loyihasining mazmun-mohiyati, ahamiyati, kutilayotgan natijalar muhokama qilindi.
2017—2022-yillarda mahkumlarning qonuniy huquq va erkinliklarini ta’minlashga qaratilgan 3 ta qonun, prezidentning 1 ta farmoni, 6 ta qarori, Hukumatning 10 ta qaror va farmoyishi hamda 10 dan ortiq boshqa normativ-huquqiy hujjatlar qabul qilindi. Bunda alohida e’tibor jinoyat sodir etgan shaxslarni mehnatga to‘liq jalb etish orqali ularni axloqan tuzalish, kelgusida jamiyatning munosib a’zosi sifatida shakllantirish masalalariga qaratilmoqda.
Seminarda turli xildagi ruhiy va jismoniy tazyiqlarning oldini olish maqsadida mamlakatdagi tergov hibsxonalaridagi tergovchilar xonalariga 123 dona zamon talablariga javob beradigan ovoz yozishga mo‘ljallangan videokuzatuv moslamalari o‘rnatilgani, tergov hibsxonalari va yopiq turdagi koloniyalarda 69 ta advokatlar bilan uchrashuv xonasi qayta jihozlanib, advokatlar uchun videokuzatuv vositalarisiz hamda eshitish moslamalarisiz alohida xonalar tashkil etilgani deputatlar tomonidan e’tirof etildi.
Hozirda Qonunchilik palatasida takomillashtirilayotgan “O‘zbekiston Respublikasining ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan o‘zgartish va qo‘shimchalar kiritish to‘g‘risida”gi qonun loyihasida ham ozodlikdan mahrum etishga hukm qilingan shaxslarga jazoni o‘tash sharoitlarini xalqaro standartlarga muvofiq takomillashtirish, mahkumlarning tuzalish yo‘liga o‘tganini belgilovchi qat’iy mezonlarni belgilash orqali ularning xulq-atvorini baholashda korrupsion omillarni bartaraf etish, mehnatga jalb etilgan mahkumlarga koloniyalardagi ish stajini umumiy mehnat stajiga qo‘shib hisoblanishini nazarda tutuvchi o‘zgartish va qo‘shimchalar kiritish nazarda tutilmoqda.
Tadbirda, shuningdek, jazoni ijro etish muassasalarida jazo muddatini o‘tayotgan mahkumlarga yaratilgan sharoitlar, ko‘rsatilayotgan tibbiy xizmat, sohada amalga oshirilayotgan ishlar, ishlab chiqarish bo‘limlarida mehnat qilayotgan mahkumlarning ishlash sharoitlari bo‘yicha tayyorlangan videorolik namoyish etildi.
Izoh (0)