Qoraqalpog‘istonning Xo‘jayli tumanida ona o‘z farzandlariga zulm o‘tkazib, ularni xo‘rlab kelgani, voqeadan jamoatchilik xabar topgach, holat yuzasidan jinoyat ishi qo‘zg‘atilgani haqida xabar berilgandi.
“Oradan to‘rt oy o‘tib, farzandlarini xo‘rlagan ayolga sud hukmi o‘qildi”, deya xabar berdi “Daryo” manbasi.
Aytilishicha, sud joriy yilning 29-iyunida bo‘lib o‘tgan.
Jinoyat ishlari bo‘yicha Xo‘jayli tuman sudi raisi Ibrayim Allaniyazov ishtirokida ko‘rib chiqilgan sud hujjatlariga ko‘ra, 31 yoshli fuqaro F.H. 2020-yilning dekabr oyidan 2021-yilning 31-iyuliga qadar Qoraqalpog‘istonning Xo‘jayli tumanidagi xonadonlardan birida rasmiy nikohdan o‘tmagan turmush o‘rtog‘i A.A.bilan yashab kelgan. Ayol Rossiya Federatsiyasiga ishlash maqsadida ketgan erini uyga qaytarish va rashk sababli o‘zining g‘ayriqonuniy rejasini qo‘llashga kirishgan. U ikki nafar voyaga yetmagan — 5 yoshli SH.H. hamda 3 yoshli A.H.larni har xil so‘zlar bilan haqoratlab, qo‘rqitib, ojiz ahvoldaligini bila turib, jismoniy va ruhiy azob berib, muttasil ravishda do‘pposlab kelgan. F.H.o‘zining bu xatti-harakatlarini qo‘l telefoni orqali videotasvirga tushirib, Rossiya Federatsiyasida ishlab yurgan turmush o‘rtog‘i A.A.ga jo‘natgan.
Shundan so‘ng F.H.ning bu xatti-harakatlari aks etgan videotasvirlar “Daryo” internet-nashri va qator turli ijtimoiy tarmoqlarda tarqalgach, huquq-tartibot idoralari tomonidan tezkor harakatlar boshlangan.
Holat yuzasidan olib borilgan kompleks sud-psixiatriya va psixologiya ekspertizasi xulosasiga ko‘ra, ijtimoiy xavfli qilmish natijasida ruhiy holatida o‘zgarish bo‘lgani bois 3 yoshli qizaloq A.H. onasining faqatgina urganini eslay olgan. 5 yoshli qizaloq SH.H.da esa qo‘rquvchanlik, yig‘loqilik, tunda uyqu holatida sapchib turib, tag ostini namlab qo‘yish belgilari shakllangani bayon qilingan.
“F.H. o‘zining bu g‘ayriqonuniy harakatlari bilan O‘zbekiston Respublikasi Jinoyat kodeksining 110-moddasi 2-qismi ‘a’, va ‘v’ bandlari (voyaga yetmagan shaxsni, ojiz ahvoldaligi aybdorga ayon bo‘lgan shaxsni qiynash)da nazarda tutilgan jinoyatni qasddan sodir qilgan. Sudlanuvchi o‘z aybiga iqrorlik bildirib, bu xatti-harakatlarini farzandlarining otasidan qattiq rashk qilgani va uni xorijdan qaytarish uchun qizlarini so‘kib, haqoratlab, urib turgan holatlarini videotasvirga olib jo‘natgani, qilmishidan chin dildan pushaymonligi, qizlarisiz yashay olmasligini bildirdi”, — deyilgan sud hujjatida.
Ma’lum bo‘lishicha, aybdor sud hukmi e’lon qilingunga qadar o‘z farzandlariga nisbatan qilgan g‘ayriqonuniy xatti-harakatlari sababli qamoqda ushlangan. U sudda qamoqda o‘tirgan vaqti davomida farzand, uy, ozodlik qadrini tushunib yetganini bildirib, o‘ziga qamoq jazosi bilan bog‘liq bo‘lmagan jazo tayinlanishini, oilasi, farzandlari bag‘riga qaytarishni so‘ragan.
Sud unga nisbatan Jinoyat kodeksining 110-moddasi 2-qismi “a”, va “v” bandlari (voyaga yetmagan shaxsni, ojiz ahvoldaligi aybdorga ayon bo‘lgan shaxsni qiynash)ni qo‘llab, uch yil muddatga ozodlikdan cheklash jazosini tayinlagan.
Izoh (0)