Xonanda Zohirshoh Jo‘rayev Konstitutsiyaning 41 va 42-moddasiga o‘zgartirish kiritilayotganini qo‘llab-quvvatlashini aytdi va bu taklifga qo‘shimcha ravishda o‘z mulohazalarini ham bildirdi.
“Oxirgi paytdagi dolzarb mavzulardan biri bosh qomusimizga o‘zgartirish kiritishlar bo‘lmoqda. Shu o‘rinda Konstitutsiyaga kiritilayotgan o‘zgartirishlardagi bir narsa mening e’tiborimni juda ham o‘ziga tortdi. Davlat iqtidorli yoshlarni, ularning moddiy ahvolidan qat’i nazar doimo qo‘llab-quvvatlashini mustaqil qoida sifatida belgilashi borasidagi taklif.
Bu ajoyib taklif, chunki bu yerda iqtidorli yoshlarni, kim bo‘lishidan qat’i nazar u sportchimi yoki bir a’lo bahoga o‘qiydigan o‘quvchimi yoki fermermi, o‘zini kasbida iqtidori bo‘lgan yoshlarni davlat tomonidan moddiy qo‘llab-quvvatlash masalasi.
Agarda shu prezidentimiz tomonidan ilgari surilayotgan bu g‘oya Konstitutsiyamizga kiritilsa, ancha iste’dodli yoshlarimizning taqdiri, kelajakdagi mutaxassisligidagi yutuqlari davlatning idoralarida chetda, qog‘ozlarning orasida qolib ketmaydi. Men bu g‘oyaga qo‘shilaman, bu g‘oyaning ortidaman”, — deydi Zohirshoh Jo‘rayev.
41-moddaning amaldagi tahriri bunday: “Har kim bilim olish huquqiga ega. Bepul umumiy ta’lim olish davlat tomonidan kafolatlanadi. Maktab ishlari davlat nazoratidadir”. Bu moddani quyidagicha yangi tahrirga o‘tkazish taklif etilmoqda:
- Har kim ta’lim olish huquqiga ega.
- Davlat maktabgacha ta’lim va tarbiyani rivojlantirishga ko‘maklashadi.
- Davlat har bir bolaning umumiy o‘rta ta’lim tashkilotlariga o‘qishga kirishi uchun majburiy bir yillik tayyorgarlikdan o‘tishga bo‘lgan huquqini kafolatlaydi.
- Bepul umumiy o‘rta ta’lim olish davlat tomonidan kafolatlanadi. Umumiy o‘rta ta’lim majburiydir.
- Maktab ishlari, maktabgacha ta’lim va tarbiya davlat nazoratida bo‘ladi.
- Ta’lim bo‘yicha alohida ehtiyojlarga va individual imkoniyatlarga ega bo‘lgan bolalar uchun ta’lim tashkilotlarida inklyuziv ta’lim va tarbiya tashkil etiladi.
- Davlat iste’dodli yoshlarning moddiy ahvolidan qat’i nazar, ta’limni davom ettirishini kafolatlaydi.
- Davlatga qarashli, xususiy va boshqa shakldagi ta’lim muassasalari hamda tashkilotlarini rivojlantirish uchun davlat teng shart-sharoitlar yaratadi.
- Pedagog xodimlarning maqomini har jihatdan mustahkamlash jamiyat va davlatning maqsadi hamda mas’uliyatli vazifasidir.
- Pedagog xodimlarning kasbiy faoliyatiga aralashishga, shuningdek, ularning xizmat majburiyatlarini bajarishiga monelik qilishga yo‘l qo‘yilmaydi.
42-moddaga ilmiy va texnikaviy ijod erkinligidan tashqari, badiiy ijod erkinligi ham qo‘shiladi:
- Har kimga ilmiy, texnikaviy va badiiy ijod erkinligi, madaniyat yutuqlaridan foydalanish huquqi kafolatlanadi.
Izoh (0)