Хонанда Зоҳиршоҳ Жўраев Конституциянинг 41 ва 42-моддасига ўзгартириш киритилаётганини қўллаб-қувватлашини айтди ва бу таклифга қўшимча равишда ўз мулоҳазаларини ҳам билдирди.
«Охирги пайтдаги долзарб мавзулардан бири бош қомусимизга ўзгартириш киритишлар бўлмоқда. Шу ўринда Конституцияга киритилаётган ўзгартиришлардаги бир нарса менинг эътиборимни жуда ҳам ўзига тортди. Давлат иқтидорли ёшларни, уларнинг моддий аҳволидан қатъи назар доимо қўллаб-қувватлашини мустақил қоида сифатида белгилаши борасидаги таклиф.
Бу ажойиб таклиф, чунки бу ерда иқтидорли ёшларни, ким бўлишидан қатъи назар у спортчими ёки бир аъло баҳога ўқийдиган ўқувчими ёки фермерми, ўзини касбида иқтидори бўлган ёшларни давлат томонидан моддий қўллаб-қувватлаш масаласи.
Агарда шу президентимиз томонидан илгари сурилаётган бу ғоя Конституциямизга киритилса, анча истеъдодли ёшларимизнинг тақдири, келажакдаги мутахассислигидаги ютуқлари давлатнинг идораларида четда, қоғозларнинг орасида қолиб кетмайди. Мен бу ғояга қўшиламан, бу ғоянинг ортидаман», — дейди Зоҳиршоҳ Жўраев.
41-модданинг амалдаги таҳрири бундай: «Ҳар ким билим олиш ҳуқуқига эга. Бепул умумий таълим олиш давлат томонидан кафолатланади. Мактаб ишлари давлат назоратидадир». Бу моддани қуйидагича янги таҳрирга ўтказиш таклиф этилмоқда:
- Ҳар ким таълим олиш ҳуқуқига эга.
- Давлат мактабгача таълим ва тарбияни ривожлантиришга кўмаклашади.
- Давлат ҳар бир боланинг умумий ўрта таълим ташкилотларига ўқишга кириши учун мажбурий бир йиллик тайёргарликдан ўтишга бўлган ҳуқуқини кафолатлайди.
- Бепул умумий ўрта таълим олиш давлат томонидан кафолатланади. Умумий ўрта таълим мажбурийдир.
- Мактаб ишлари, мактабгача таълим ва тарбия давлат назоратида бўлади.
- Таълим бўйича алоҳида эҳтиёжларга ва индивидуал имкониятларга эга бўлган болалар учун таълим ташкилотларида инклюзив таълим ва тарбия ташкил этилади.
- Давлат истеъдодли ёшларнинг моддий аҳволидан қатъи назар, таълимни давом эттиришини кафолатлайди.
- Давлатга қарашли, хусусий ва бошқа шаклдаги таълим муассасалари ҳамда ташкилотларини ривожлантириш учун давлат тенг шарт-шароитлар яратади.
- Педагог ходимларнинг мақомини ҳар жиҳатдан мустаҳкамлаш жамият ва давлатнинг мақсади ҳамда масъулиятли вазифасидир.
- Педагог ходимларнинг касбий фаолиятига аралашишга, шунингдек, уларнинг хизмат мажбуриятларини бажаришига монелик қилишга йўл қўйилмайди.
42-моддага илмий ва техникавий ижод эркинлигидан ташқари, бадиий ижод эркинлиги ҳам қўшилади:
- Ҳар кимга илмий, техникавий ва бадиий ижод эркинлиги, маданият ютуқларидан фойдаланиш ҳуқуқи кафолатланади.
Изоҳ (0)