Rossiya Bosh shtabi AQSH 2028-yilgacha Yaponiyaning Io oroliga 5,5 ming km masofali gipertovushli raketalar joylashtirish rejalari haqida ma’lum qildi, deb yozadi “Interfaks”.
“Pentagon 2028-yilgacha Tinch okeanining g‘arbiy qismiga ikkita istiqbolli ko‘p sohali brigadalarni joylashtirmoqchi, ular kiberoperatsiyalarni o‘tkazishga qodir bo‘ladi va katta masofali yuqori aniqlikdagi qurol bilan, shu jumladan, 5500 km.gacha yetadigan gipertovushli raketalar bilan jihozlanadi. Ular Uzoq Sharq hududidagi o‘ta muhim obyektlarni nishonga olishi mumkin, bu Rossiya Federatsiyasi harbiy xavfsizligiga tahdid yaratadi”, — dedi Rossiya Qurolli kuchlari Bosh shtabi Bosh texkor boshqarmasi boshlig‘i o‘rinbosari Viktor Poznixir.
“Yaratilayotgan o‘rta masofali raketalarning ehtimoliy baza punkti sifatida Yaponiyaning Io oroli hududidagi aerodrom va yadro o‘q-dorilari ombori ko‘rib chiqilmoqda”, — dedi Poznixir Moskvadagi X Xalqaro xavfsizlik konferensiyasida.
Uning so‘zlariga ko‘ra, Vashington tomonidan, shuningdek, “o‘rta masofali ballistik raketalarni Osiyo davlatlari, birinchi navbatda, Yaponiya hududiga joylashtirish imkoniyati ishlab chiqilmoqda”.
Poznixir qayd etishicha, AQSH soni allaqachon 400 ming kishini tashkil qiluvchi milliy qurolli kuchlar guruhini ham ko‘paytirmoqda, shuningdek, mintaqada harbiy-siyosiy vaziyat keskinlashgan taqdirda jangovar shay harbiy guruhlarni tezkorlik bilan joylashtirish uchun uning zarba berish potensialini ham kuchaytirmoqda.
“Vashington raketaga qarshi mudofaa global tizimining Tinch okeani segmentini faol kuchaytirmoqda. O‘z navbatida, Tokio tezlashtirilgan sur’atlarda AQSHning global raketaga qarshi mudofaasini to‘ldiruvchi o‘z raketaga qarshi mudofaa milliy tizimini yaratmoqda”, — dedi Poznixir.
Uning ta’kidlashicha, “AQSH tomonidan ushbu rejalarning amalga oshirilishi vaziyatning beqarorlashuviga, Osiyo-Tinch okeani mintaqasida keskinlik oshishiga olib keladi, shuningdek, boshqa davlatlarni o‘z raketa salohiyatini takomillashtirishga va kuchaytirishga chaqiradi, bu esa yakunda qurollanish bo‘yicha nazorat qilinmaydigan poygani keltirib chiqaradi”.
Izoh (0)