Россия Бош штаби АҚШ 2028 йилгача Япониянинг Ио оролига 5,5 минг км масофали гипертовушли ракеталар жойлаштириш режалари ҳақида маълум қилди, деб ёзади «Интерфакс».
«Пентагон 2028 йилгача Тинч океанининг ғарбий қисмига иккита истиқболли кўп соҳали бригадаларни жойлаштирмоқчи, улар кибероперацияларни ўтказишга қодир бўлади ва катта масофали юқори аниқликдаги қурол билан, шу жумладан, 5500 км.гача етадиган гипертовушли ракеталар билан жиҳозланади. Улар Узоқ Шарқ ҳудудидаги ўта муҳим объектларни нишонга олиши мумкин, бу Россия Федерацияси ҳарбий хавфсизлигига таҳдид яратади», — деди Россия Қуролли кучлари Бош штаби Бош техкор бошқармаси бошлиғи ўринбосари Виктор Познихир.
«Яратилаётган ўрта масофали ракеталарнинг эҳтимолий база пункти сифатида Япониянинг Ио ороли ҳудудидаги аэродром ва ядро ўқ-дорилари омбори кўриб чиқилмоқда», — деди Познихир Москвадаги Х Халқаро хавфсизлик конференциясида.
Унинг сўзларига кўра, Вашингтон томонидан, шунингдек, «ўрта масофали баллистик ракеталарни Осиё давлатлари, биринчи навбатда, Япония ҳудудига жойлаштириш имконияти ишлаб чиқилмоқда».
Познихир қайд этишича, АҚШ сони аллақачон 400 минг кишини ташкил қилувчи миллий қуролли кучлар гуруҳини ҳам кўпайтирмоқда, шунингдек, минтақада ҳарбий-сиёсий вазият кескинлашган тақдирда жанговар шай ҳарбий гуруҳларни тезкорлик билан жойлаштириш учун унинг зарба бериш потенциалини ҳам кучайтирмоқда.
«Вашингтон ракетага қарши мудофаа глобал тизимининг Тинч океани сегментини фаол кучайтирмоқда. Ўз навбатида, Токио тезлаштирилган суръатларда АҚШнинг глобал ракетага қарши мудофаасини тўлдирувчи ўз ракетага қарши мудофаа миллий тизимини яратмоқда», — деди Познихир.
Унинг таъкидлашича, «АҚШ томонидан ушбу режаларнинг амалга оширилиши вазиятнинг беқарорлашувига, Осиё-Тинч океани минтақасида кескинлик ошишига олиб келади, шунингдек, бошқа давлатларни ўз ракета салоҳиятини такомиллаштиришга ва кучайтиришга чақиради, бу эса якунда қуролланиш бўйича назорат қилинмайдиган пойгани келтириб чиқаради».
Изоҳ (0)