Jinoyat ishlari bo‘yicha bo‘yicha Jalaquduq tuman sudi UzAutoMotors va uning negizidagi korxonalarga o‘zlari va yaqinlarini ishga joylashtirish maqsadida 1000 dollardan 2000 dollargacha pora bergan shaxslarga hukm o‘qidi. Bu haqda “Daryo”ga Andijon viloyati sudi axborot xizmati xabar bermoqda.
Aniqlanishicha, Asaka tumanida yashovchi fuqarolar Asaka shahrida joylashgan UzAutoMotors va jamiyat negizidagi korxonalarga o‘zlari va yaqinlarini ishga joylashtirish uchun Asaka tumani Aholi bandligiga ko‘maklashish markazi xodimi O.Z.ga murojaat qilgan. Murojaatchilar xodimga ularni markaz orqali ishga joylashtirib qo‘yishini iltimos qilib, 2019-yilning oktabr—dekabr oylari davomida B.T., M.R., M.M., N.Q., G.S.lar hisobidan 1000 dollardan, G.T.dan esa 100 dollar va 1 million 761 ming so‘m, M.A.dan 1500 hamda N.G‘.dan 2000 dollardan pul bergan.
Ta’kidlanishicha, sud sudlanuvchilardan yuqoridagi pul mablag‘larini olgan O.Z. va boshqalarga nisbatan jinoyat ishlari bo‘yicha Asaka tuman sudi tomonidan 2020-yilning 7-dekabr kungi hukmiga muvofiq pora predmeti sifatida olinib, davlat ixtiyoriga o‘tkazish belgilangan summalarni sudlanuvchilarni ayblov zimmasida qoldirgan.
Ushbu ishni ko‘rib chiqqan sudya Zarifjon Rahimov sudlanuvchilar T.B., T.G., X.G., A.M., G‘.N., Q.N., S.G.larni Jinoyat kodeksining 211-moddasi (pora berish)1-qismida nazarda tutilgan jinoyatni sodir etganlikda aybli deb topgan. Ularga nisbatan 2 yil muddatga u yoki bu sabab bilan sutkaning soat 23:00 dan 05:00 gacha yashash joyidan chiqishni cheklash tarzidagi ozodlikni cheklash jazosi tayinlangan.
Qolgan sudlanuvchilar R.M. va M.M.lar esa Jinoyat kodeksining 211-moddasi 1-qismida nazarda tutilgan jinoyatni sodir etganlikda aybli deb topilib, ularga nisbatan Jinoyat kodeksining 57-moddasi qo‘llanib, ish haqining 10 foizini davlat daromadiga ushlab qolgan holda 2 yil muddatga axloq tuzatish ishlari jazosi tayinlangan.
Izoh (0)