Жиноят ишлари бўйича бўйича Жалақудуқ туман суди UzAutoMotors ва унинг негизидаги корхоналарга ўзлари ва яқинларини ишга жойлаштириш мақсадида 1000 доллардан 2000 долларгача пора берган шахсларга ҳукм ўқиди. Бу ҳақда «Дарё»га Андижон вилояти суди ахборот хизмати хабар бермоқда.
Аниқланишича, Асака туманида яшовчи фуқаролар Асака шаҳрида жойлашган UzAutoMotors ва жамият негизидаги корхоналарга ўзлари ва яқинларини ишга жойлаштириш учун Асака тумани Аҳоли бандлигига кўмаклашиш маркази ходими О.З.га мурожаат қилган. Мурожаатчилар ходимга уларни марказ орқали ишга жойлаштириб қўйишини илтимос қилиб, 2019 йилнинг октябрь—декабрь ойлари давомида Б.Т., М.Р., М.М., Н.Қ., Г.С.лар ҳисобидан 1000 доллардан, Г.Т.дан эса 100 доллар ва 1 миллион 761 минг сўм, М.А.дан 1500 ҳамда Н.Ғ.дан 2000 доллардан пул берган.
Таъкидланишича, суд судланувчилардан юқоридаги пул маблағларини олган О.З. ва бошқаларга нисбатан жиноят ишлари бўйича Асака туман суди томонидан 2020 йилнинг 7 декабрь кунги ҳукмига мувофиқ пора предмети сифатида олиниб, давлат ихтиёрига ўтказиш белгиланган суммаларни судланувчиларни айблов зиммасида қолдирган.
Ушбу ишни кўриб чиққан судья Зарифжон Раҳимов судланувчилар Т.Б., Т.Г., Х.Г., А.М., Ғ.Н., Қ.Н., С.Г.ларни Жиноят кодексининг 211-моддаси (пора бериш)1-қисмида назарда тутилган жиноятни содир этганликда айбли деб топган. Уларга нисбатан 2 йил муддатга у ёки бу сабаб билан сутканинг соат 23:00 дан 05:00 гача яшаш жойидан чиқишни чеклаш тарзидаги озодликни чеклаш жазоси тайинланган.
Қолган судланувчилар Р.М. ва М.М.лар эса Жиноят кодексининг 211-моддаси 1-қисмида назарда тутилган жиноятни содир этганликда айбли деб топилиб, уларга нисбатан Жиноят кодексининг 57-моддаси қўлланиб, иш ҳақининг 10 фоизини давлат даромадига ушлаб қолган ҳолда 2 йил муддатга ахлоқ тузатиш ишлари жазоси тайинланган.
Изоҳ (0)