O‘zbekistonda yil yakunigacha mingdan ortiq mahallada tibbiyot punkti tashkil etiladi. Bu haqda Sog‘liqni saqlash vazirligi matbuot xizmati xabar berdi.
Prezidentning tegishli farmon va qarorlarida 2022-yilda 105 ta oilaviy shifokor punkti va 31 ta oilaviy poliklinika, shuningdek, 1002 ta mahalla tibbiyot punkti tashkil etilishi belgilangan edi. Bunga, avvalo, birlamchi tibbiyot tizimini takomillashtirish orqali erishiladi.
Ammo mahallalar kesimida oilaviy shifokor punkti joylashgan masofa inobatga olinsa, ayrim hududlar aholisi bu bo‘g‘in xizmatidan foydalanishda qiyinchiliklarga duch kelmoqda. Masalan, Dehqonobod tumanining “Oqirtma” mahallasida 3,5 ming nafar aholi yashaydi. Biroq bu manzildan hudud poliklinikasigacha bo‘lgan masofa 46 kilometrga teng. Bunday misollarni ko‘plab keltirish mumkin. Shu bois birlamchi tibbiyot tizimini xalqqa yaqinlashtirish maqsadida 2022-yil davomida 105 ta oilaviy shifokor punkti va 31 ta oilaviy poliklinikani ishga tushirish reja qilingan.
Hozirgacha shundan 76 ta oilaviy shifokor punkti va 20 ta oilaviy poliklinika faoliyati yo‘lga qo‘yildi. Lekin bu mavjud ehtiyojni to‘liq qoplay olmaydi. Shundan kelib chiqib, yil yakuniga qadar 1002 ta mahalla tibbiyot punktini ishga tushirish ko‘zda tutilgan. Ayni paytda joylarda 505 ta shunday muassasa aholiga tibbiy xizmat ko‘rsatmoqda.
Mahalla tibbiyot punktlarida oilaviy shifokor va patronaj hamshirasi tomonidan qon bosimi hamda tana haroratini o‘lchash, zarur hollarda shoshilinch tibbiy xizmat ko‘rsatish, ko‘rsatmaga muvofiq vena va mushak orasiga inyeksiyalar yuborish kabi birlamchi tibbiy xizmat amalga oshiriladi.
Qolaversa, bu yerda rejaga muvofiq, bolalarda emlash ishlari, aholi orasida keng tarqalgan endokrin kasalliklarining dastlabki skrining tadbirlari amalga oshiriladi. Homilador ayollar, yangi tug‘ilgan chaqaloqlar va to‘shakka mixlanib qolgan bemorlar patronaji, shuningdek, sog‘lom turmush targ‘iboti ushbu muassasalar tomonidan olib boriladi.
Izoh (0)