Ўзбекистонда йил якунигача мингдан ортиқ маҳаллада тиббиёт пункти ташкил этилади

Ўзбекистонда йил якунигача мингдан ортиқ маҳаллада тиббиёт пункти ташкил этилади. Бу ҳақда Соғлиқни сақлаш вазирлиги матбуот хизмати хабар берди.

Президентнинг тегишли фармон ва қарорларида 2022 йилда 105 та оилавий шифокор пункти ва 31 та оилавий поликлиника, шунингдек, 1002 та маҳалла тиббиёт пункти ташкил этилиши белгиланган эди. Бунга, аввало, бирламчи тиббиёт тизимини такомиллаштириш орқали эришилади.

Аммо маҳаллалар кесимида оилавий шифокор пункти жойлашган масофа инобатга олинса, айрим ҳудудлар аҳолиси бу бўғин хизматидан фойдаланишда қийинчиликларга дуч келмоқда. Масалан, Деҳқонобод туманининг «Оқиртма» маҳалласида 3,5 минг нафар аҳоли яшайди. Бироқ бу манзилдан ҳудуд поликлиникасигача бўлган масофа 46 километрга тенг. Бундай мисолларни кўплаб келтириш мумкин. Шу боис бирламчи тиббиёт тизимини халққа яқинлаштириш мақсадида 2022 йил давомида 105 та оилавий шифокор пункти ва 31 та оилавий поликлиникани ишга тушириш режа қилинган.

Ҳозиргача шундан 76 та оилавий шифокор пункти ва 20 та оилавий поликлиника фаолияти йўлга қўйилди. Лекин бу мавжуд эҳтиёжни тўлиқ қоплай олмайди. Шундан келиб чиқиб, йил якунига қадар 1002 та маҳалла тиббиёт пунктини ишга тушириш кўзда тутилган. Айни пайтда жойларда 505 та шундай муассаса аҳолига тиббий хизмат кўрсатмоқда.

Маҳалла тиббиёт пунктларида оилавий шифокор ва патронаж ҳамшираси томонидан қон босими ҳамда тана ҳароратини ўлчаш, зарур ҳолларда шошилинч тиббий хизмат кўрсатиш, кўрсатмага мувофиқ вена ва мушак орасига инъекциялар юбориш каби бирламчи тиббий хизмат амалга оширилади.

Қолаверса, бу ерда режага мувофиқ, болаларда эмлаш ишлари, аҳоли орасида кенг тарқалган эндокрин касалликларининг дастлабки скрининг тадбирлари амалга оширилади. Ҳомиладор аёллар, янги туғилган чақалоқлар ва тўшакка михланиб қолган беморлар патронажи, шунингдек, соғлом турмуш тарғиботи ушбу муассасалар томонидан олиб борилади.