«Экоқўмита раисига 4 талаб машина хизмат қилаётган бир пайтда унинг чекка ҳудудлардаги ходимлари 1,5 миллион сўм ойликка кун кўрмоқда» сарлавҳали хабар эълон қилиниб, жамоатчилик муҳокамасига сабаб бўлганди. Экология ва атроф-муҳитни муҳофаза қилиш давлат қўмитаси раис Нарзулло Обломуродов атрофида бўлаётган вазият юзасидан муносабат билдирди.
Унда таъкидланишича, қўмита раҳбарияти хизмат автомашиналаридан қонунчилик ҳужжатларида белгиланган тартиб-қоидаларга асосан фойдаланиб келмоқда. Қўмита раисига 1 та Mercedes автотранспорт воситаси бириктирилган. Шунингдек, зарур ҳолларда хизмат вазифасини ўташ давомида олис ва чекка ҳудудларга хизмат сафари вақтида ёнилғи харажатларини тежаш мақсадида техник кўмак маблағлари ҳисобидан харид қилинган навбатчи электромобиль ишлатилиши мумкин.
Шу билан бирга, шуни маълум қиламизки, жорий йилнинг ўтган даврида қўмитанинг барча ҳудудий бўлинмалари, шу жумладан, Қорақалпоғистон Республикаси, Бухоро ва Навоий вилоятларининг олис ва чекка ҳудудларида жойлашган муҳофаза этиладиган табиий ҳудудларнинг моддий-техник базасини яхшилаш мақсадида 40 дан ортиқ автотранспорт воситалари («Niva», электромобиль, Damas) хорижий ҳамкорларнинг техник кўмак маблағлари ҳисобидан харид қилинди. Таъкидлаш лозимки, ушбу автотранспорт воситалари хариди учун бюджет маблағлари умуман сарф қилинмаган, — дейилади расмий муносабатда.Қўмита шу ўринда шахснинг қадр-қиммати камситилишига ёки унинг обрўсизлантирилишига олиб келадиган ёлғон, асосланмаган ахборотни тарқатганлик учун Ўзбекистон қонунчилигида тегишли жавобгарлик нормалари белгиланганини эслатиб ўтган.
Изоҳ (0)