O‘zbekistonda 2022/2023-o‘quv yilidan ilk bor transplantologiya va kardioxirurgiya bo‘yicha mutaxassislar tayyorlanadi. Bu haqda Sog‘liqni saqlash vazirligi matbuot xizmati xabar bermoqda.
Qayd etilishicha, joriy o‘quv yilidan akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi va Respublika shoshilinch tibbiy yordam ilmiy markazida “Transplantologiya” va “Kardioxirurgiya” mutaxassisliklari bo‘yicha klinik ordinatura (rezidentura) mutaxassisligi bo‘yicha ta’lim olish yo‘lga qo‘yiladi.
Muassasalarga sog‘liqni saqlash vazirining tegishli buyrug‘i bilan mahalliy va xalqaro tajribaga asoslangan holda ushbu mutaxassisliklar bo‘yicha o‘quv dasturlari tuzish topshirig‘i berildi. “Kardioxirurgiya” va “Transplantologiya” mutaxassisliklarining murakkabligini hisobga olgan holda ularga faqatgina “Xirurgiya” bo‘yicha magistratura yoki “Umumiy xirurgiya” klinik ordinatura (rezidentura)ni bitirgan mutaxassislar hujjat topshira oladi.
Nomzodlar umumiy tanlov asosida qabul qilinishi belgilangan bo‘lib, bu yo‘nalishlarda amaliyotga yo‘naltirilgan o‘quv jarayoni 3 yil davom etadi.
Ma’lumot uchun, 2022/2023-o‘quv yilidan boshlab maqsadli va to‘lov-kontrakt asosida o‘qishga kirgan klinik ordinatorlarning o‘quv jarayoni birinchi va ikkinchi (o‘qish muddati 3 yil bo‘lgan mutaxassisliklar uchun) yillari tibbiyot institutlari klinikasi va ixtisoslashgan markazlarda o‘qitiladi.
O‘quv davrining bitiruv (ikkinchi, uchinchi) yilining ikkinchi semestrida (o‘quv muddatining oxirgi o‘quv semestrida) hududlardagi ixtisoslashgan tibbiyot markazlari filiallari, viloyat bolalar va kattalar ko‘p tarmoqli tibbiyot markazlari, Respublika shoshilinch tez tibbiy yordam markazi filiallarida o‘quv amaliyot semestri o‘tkaziladi.
Izoh (0)