Актёр Эгамберди Раҳимов томошабинларга «Тубанлик» фильмидаги ўз қизини ёши катта муллага турмушга берган Қўчқорбек роли билан яхши таниш. У актёрлик фаолиятида анча камнамо бўлиб қолди. Айримларнинг фикрича, у санъатдан кетиб, табиблик билан шуғулланаётган экан. «Дарё» мухбири Наргиза Муродова бунга ойдинлик киритди.
— «Нега фильмларда камнамосиз?» деган саволни аслида менга эмас, режиссёрларга бериш керак. Актёр улар таклиф этсагина, ролни ижро этади. Кейин аввалгидек фильмлар кўп эмас. Таклиф этилганига бориб, сценарий билан танишиб кўраман. Сценарий ва гонорар суммаси маъқул бўлсагина, розилик бераман. Қолган пайт эса севимли машғулотларим билан бандман. Айримлар ўйлаганидек, табиблик билан шуғулланаётганим йўқ. Аммо табобатга жуда қизиқаман. Сунъийликдан кўра, Яратган неъматлари билан соғлом бўлиш тарафдориман. Бу соҳага қизиқишим аввалдан бўлган. Унинг ижодга ҳеч қандай таъсири йўқ.
Эгамберди Раҳимов қиммат актёр ҳисобланади. У юқори гонорар сўрагани учун кўпчилик ижодкорлар у билан ҳамкорлик қилишга чўчишади.
— Мен учун сценарий ва гонорар суммаси муҳим аҳамиятга эга. Сабаби актёр ҳам ҳамма қатори инсон. Унинг ҳам рўзғори, кам-кўсти бор. Агар олган гонораримга бозорга кириб, иккита халта рўзғорлик қилолмасам, ижоднинг қадр-қиймати қоладими? Уч-тўрт йил олдин театрда ишлайдиган яқин танишим қўнғироқ қилиб «Россиядан бир акамиз келяпти, ҳеч ишдан бўшолмаяпман, икки кун шу инсон билан шаҳар айланоласизми?», деб илтимос қилди. Рози бўлиб, меҳмонга янги Тошкентни кўрсатдим. У ижодкорларга яратилган шарт-шароитларни кўрди, суҳбатда бўлди. Кетар чоғида «Ижодкорнинг қадри йўқ экан, завод ишчиси билан бир хил ойлик оларкан», деди. Ҳақиқатан ҳам ижодкорларга тўланадиган гонорар анча кам.
Актёр бир неча йил аввал театрларда ҳам фаолият юритган. Аммо қандайдир сабаб билан театрдан кетишга қарор қилган. Бунинг сабабини у қуйидагича изоҳлади. — «Ёш томошабинлар» ва «Илҳом» театрларида ишлаганман. Аммо ойликларнинг камлиги боис театрдаги фаолиятимни якунлашга мажбур бўлгандим. Ҳозир театрлардаги аҳвол қандайлигини билмадим-у, аввал ҳавас қилгудек эмас эди. Ойликлар кам, шароит деярли йўқ бўлгани учун театрда ишлаш осон эмасди. «Илҳом» театридаги вазият ўша вақтда ҳам ўзбек театрларига нисбатан анча яхшироқ эди. «Ёш томошабинлар театри»да актёр кийимидан тортиб, реквизитини топишга ҳам ўзи масъул эди. «Илҳом»да эса актёр фақат роли ҳақида қайғурарди. Театрда ишлаш жуда қийин. Шунга яраша ижодкор ҳам рағбатлантирилса яхши бўлади.
Ҳозирги кунда кўпчилик устоз актёрлар ҳам сериалларда ёки ижтимоий тармоқлар учун олинаётган роликларда суратга тушмоқда. Бу борада сизга ҳам таклифлар бўлдими, деган савол актёрни бироз ўйлантириб қўйди.
— Таклиф қилишади, пулнинг ортидан қувмай, илмнинг ортидан борадиган ёшга етдим. Пул берар экан, экранда кўринар эканман, дейдиган ёшда эмасман. Деярли телевизор кўрмайман, чунки кўрсам жаҳлим чиқишини биламан. Ҳамма режиссёрларни ёмон деёлмайман, аввалдан яхши кино ва сериал олиб юрганлар кўп. Аммо сериал олаётганларнинг кўпчилиги фақат пул топиш дардида шу ишга қўл уришяпти. Улар ҳомий топишни, фирмадан фирмага пул ўтказишни қойиллатишади, аммо ижодга келганда — ҳаммаси юмалоқ ёстиқ бўлиб кетади.Баъзида эса соқолим борасида тортишиб қоламиз. Мен иккинчи курсда ўқиётганимдан бери соқол ўстираман. Умрим мобайнида бир марта давлат тадбирига таклиф этишганида уни олганман. Хуллас, кино олингунига қадар музокаралар кўп бўлади.
Илмнинг эрта-кечи йўқ. Инсон ҳамиша илм олиши, муқаддимамиз ва якунимиз қандай бўлишини англаб етмоғимиз лозим. Ёшгина бола эдим, иккинчи ўғлим туғилганида кап-катта эркак бўлиб қолганимни англадим. Ҳозир эса болаларимнинг боласини кўриб, умримнинг анча қисмини босиб ўтганимни англайман.
Мавзуга доир:
- «Ислом дини ва чин мусулмонларга қаршилигим йўқ». Ҳилол Насимов жанозасига келмайдиган ҳамкасби ҳамда фильмлари қаҳрамонларининг прототиплари ҳақида (видео)
- «Тубанлик»даги Дилроз — актриса Зиёда Худойқулова нега кинони тарк этди? (фото)
- Матёқуб Матчонов давлат ишидаги 3 млн ойлик билан қандай қилиб 120 минг долларлик BMW’да юргани ҳамда киноларда кўринмай қолишининг сабаби ҳақида (видео)
- «Бошида Жаҳонгир Аҳмедовдан ранжидим». Матёқуб Матчонов «Илҳақ» фильмидаги раис ролини ижро қилмоқчи бўлгани, аммо шогирди ролни унга бермагани сабаби ҳақида (видео)
Изоҳ (0)