Samarqand viloyatidagi “Jartepa” chegara bojxona postida to‘xtatilgan “Tracker Trkat” avtomashinasidan marixuana giyohvandlik vositasi topildi. Bu haqda viloyat bojxona boshqarmasi xabar berdi.
Ma’lum qilinishicha, “Jartepa” chegara bojxona posti orqali qo‘shni davlatdan kirib kelgan fuqaro S.G‘.ning bojxona nazorati zonasidan o‘tish vaqtida o‘zini tutishi xodimlar e’tiborini tortgan.
Shundan so‘ng uning boshqaruvida bo‘lgan “Tracker Trkat” avtotransport vositasi tekshirilgan. Haydovchi tomondagi rulning past qismidagi kichik bardachogi ichida to‘kilgan holda turgan yashil rangli, o‘tkir hidli, o‘tsimon, sof og‘irligi 0,31 gramm marixuana giyohvandlik vositasi topilib, ashyoviy dalil sifatida rasmiylashtirilib olingan.
Samarqand viloyati sud-tibbiy ekspertiza byurosining xulosasiga ko‘ra sudlanuvchi S.G‘.ning organizmida kanabinioidlar (nasha komponentlari) aniqlangan. Mazkur holat yuzasidan Jinoyat ishlari bo‘yicha sudning hukmi bilan Jinoyat kodeksining tegishli moddalariga muvofiq, sudlanuvchi S.G‘.ga bazaviy hisoblash miqdorining 200 baravari miqdorida — 54 million so‘m jarima jazosi tayinlangan.
Shuningdek, “Tracker Trkat” jinoyat quroli sifatida davlat foydasiga musodara qilingan.
Izoh (0)