Buxoro va Andijon viloyatlarida fuqarolarni ishga kiritib qo‘yish hamda xorijga ishga yuborishni va’da qilgan fuqarolar ushlandi. Bu haqda Iqtisodiy jinoyatlarga qarshi kurashish departamenti xabar berdi.
Qayd etilishicha, Bosh prokuratura huzuridagi departamentning Kogon shahri bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro A.A. hamda “E.E.” xorijiy kompaniyasida ishlovchi S.G. o‘zaro til biriktirib, fuqaro R.ni ushbu kompaniyaga ishga kiritib qo‘yish evaziga 600 dollarni olgan vaqtida ashyoviy dalillar bilan ushlangan.
Shu kabi holat Andijonda ham kuzatilgan. Departament hamda DXXning Qo‘rg‘ontepa tumani bo‘limlari tomonidan o‘tkazilgan tezkor tadbirda fuqaro N.X. boshqa bir fuqaro N.ni tanishlari yordamida Estoniyaga ishga yuborishi evaziga 800 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)