Toshkent, Andijon va Namangan viloyatlari hamda Toshkent shahrida yer sotish, shuningdek, qurilish bilan bog‘liq noqonuniy holatlarga chek qo‘yildi.
Xususan, Toshkent shahrida yashovchi, 1985-yilda tug‘ilgan shaxs Toshkent viloyati Parkent tumanida istiqomat qiluvchi, 1969-yilda tug‘ilgan tanishi bilan o‘zaro til biriktirib, ushbu tuman hududida joylashgan 3 gektar yer maydonini mansabdor tanishlari orqali xaridor nomiga rasmiylashtirib, uni turar joy uchun mo‘ljallangan yer maydoniga o‘zgartirib berish evaziga 280 ming dollar talab qilgan.
Davlat xavfsizlik xizmatining Toshkent viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazilgan tezkor tadbirda mazkur shaxslar so‘ralgan puldan 50 ming dollarni oldindan olgan vaqtida ushlandi.
DXXning Andijon viloyati bo‘yicha boshqarmasi xodimlari tomonidan departamentning hududiy boshqarmasi bilan hamkorlikda o‘tkazilgan tezkor tadbirda Andijon shahrida yashovchi, 1978-yilda tug‘ilgan, muqaddam bir necha bor sudlangan shaxs aldov yo‘li bilan fuqarodan 13 ming dollar olgan vaqtida ushlandi.
Aniqlanishicha, u Andijon shahridagi umumta’lim maktablaridan biriga tegishli bo‘lgan 20 sotix yer maydonini go‘yoki auksion savdolarida sotib olganini ta’kidlab, mazkur yer maydonini ushbu fuqaroga 48 ming dollar evaziga sotishga uringan va undan muqaddam 11 ming dollar ham olgan.
Bu yo‘nalishda DXX xodimlari tomonidan Bosh prokuratura huzuridagi departamentning Toshkent shahri boshqarmasi bilan hamkorlikda o‘tkazilgan ko‘p bosqichli tezkor tadbirda oldindan jinoiy til biriktirgan 3 nafar fuqaro ushlandi.
Dastlab Namangan viloyati Pop tumanidagi 20 gektar yer maydonida “Yangi O‘zbekiston” massivini barpo etish doirasida rejalashtirilgan 105 ta ko‘p qavatli uydan 8 tasini qurish ruxsatini olib berish evaziga 80 ming dollar talab qilgan va ushbu pul mablag‘idan 40 ming dollarini oldindan berishini so‘ragan, Toshkent shahrida yashovchi, muqaddam firibgarlik bilan bog‘liq jinoyat sodir etgani uchun sudlanib, hozirda axloq tuzatish ishlari jazosini o‘tayotgan, 1984-yilda tug‘ilgan shaxs 2300 dollarni o‘zining xizmat haqi va xarajatlari uchun olgan vaqtida ushlandi.
Olib borilgan tezkor surishtiruv tadbirlari davomida u oldindan so‘ralgan 40 ming dollarni muqaddam firibgarlik bilan bog‘liq sodir etgan harakatlari uchun hozirda ichki ishlar organlari tomonidan qidiruvda bo‘lgan, Toshkent shahrida yashovchi, 1980-yilda tug‘ilgan tanishiga berishi kerakligi ma’lum bo‘ldi va tezkor tadbir davom ettirilib, 37 700 dollarni olgan vaqtida ushbu shaxs ham qo‘lga olindi.
O‘z navbatida, u ham o‘zaro kelishuvga muvofiq, umumiy 80 ming dollardan 48 ming dollarini Pop tumani hokimining sobiq o‘rinbosariga berishi kerakligini bildirdi va Pop tumanida o‘tkazilgan tezkor tadbirda sobiq mansabdor shaxs 6,5 ming dollarni oldindan olgan vaqtida ushlandi.
Hozirda uchala holat bo‘yicha Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)