O‘zbekistonda 8-avgust kuni “Davlat fuqarolik xizmati to‘g‘risida”gi qonun qabul qilindi. Hujjatning 13-moddasida davlat fuqarolik xizmatchilariga bir qator cheklovlar belgilangan. Quyida ularni e’tiboringizga havola qilamiz.
Yaqin qarindosh bilan bir joyda ishlash va tadbirkorlikka cheklovlar
Moddaning birinchi bandiga ko‘ra, davlat fuqarolik xizmatchilari o‘zaro yaqin qarindoshlikda yoki quda tomondan qarindosh bo‘lgan shaxslar bilan aynan bitta davlat organida birga xizmat qilishi, ulardan birining ikkinchisiga bevosita bo‘ysunishiga yoki uning nazorati ostida bo‘ladigan davlat fuqarolik xizmati lavozimini egallashi man etiladi.
Shu bilan birga, pedagogik, ilmiy va ijodiy faoliyatdan tashqari haq to‘lanadigan boshqa faoliyat bilan shug‘ullanish ham taqiqlanadi. Bunda O‘zbekiston qonunlari hamda prezident qarorlarida nazarda tutilgan holatlar mustasno.
Modda bilan davlat fuqarolik xizmatchisi tadbirkorlik faoliyati bilan shug‘ullanishiga cheklov qo‘yildi. Agarda tadbirkorlik bilan shug‘ullanib kelayotgan shaxs davlat fuqarolik xizmatiga qabul qilinsa, tadbirkorlik faoliyatini to‘xtatishi kerakligi belgilandi.
Shu bilan birga, tadbirkorlik faoliyati subyektlarini tashkil etish, ularning muassisi (ishtirokchisi) bo‘lish, tadbirkorlik faoliyati subyektida tashkiliy-boshqaruv, ma’muriy-xo‘jalik vazifalarini bajarish ham mumkin emas. Bundan aksiyadorlik jamiyatlarining erkin muomalada bo‘lgan aksiyalariga konunchilikda belgilangan talablar doirasida egalik qilish hollari mustasno.
Noqonuniy imtiyozlar va sovg‘alar olish
Moddada davlat fuqarolik xizmatchisining o‘z xizmat vakolatlarini jismoniy va yuridik shaxslarning manfaatlarini ko‘zlab bajarish yoki bajarmaslik evaziga ulardan biron-bir mukofot, foyda yoki sovg‘alar olish taqiqlanadi.
Unga qonunchilikda nazarda tutilmagan imtiyozlar, preferensiyalar yoki afzalliklardan o‘z xizmat mavqeyi bilan bog‘liq holda foydalanishga ham mumkin emas.
Xorij bilan bog‘liq cheklovlar
Modda bilan davlat fuqarolik xizmatchisi O‘zbekiston hududidan tashqarida hisobvaraqlar ochishi va ularga ega bo‘lishi, ko‘chmas mulkka va boshqa mol-mulkka egalik qilishi ham taqiqlandi. Bundan chet davlatda ta’lim olish, stajirovka o‘tash va tibbiy xizmatlardan foydalanish maqsadida ochilgan hisobvaraqlar, shuningdek, davlat fuqarolik xizmatiga kirishdan oldin olingan va oshkor qilingan mol-mulk mustasno.
Davlat fuqarolik xizmatchisi chet davlat fuqaroligini olishga ham haqli emas.
Qonunda belgilanishicha, unga o‘zi xizmat qilayotgan davlat organi nazorati ostidagi yoki u bilan aloqalar va manfaatlarga ega bo‘lgan tashkilotlardagi ulushlarni, paylarni va aksiyalarni bevosita yoki vakillar orqali olishi ham man etiladi.
Shu bilan birga, davlat fuqarolik xizmatchisi o‘zining vakolatlarini siyosiy partiyalar va boshqa jamoat birlashmalari, turli organlarning manfaatlarini ko‘zlab amalga oshirishi ham taqiqlanadi.
Qonun rasmiy e’lon qilingan kundan 3 oy o‘tgach kuchga kiradi.
Izoh (0)