Ўзбекистонда 8 август куни «Давлат фуқаролик хизмати тўғрисида»ги қонун қабул қилинди. Ҳужжатнинг 13-моддасида давлат фуқаролик хизматчиларига бир қатор чекловлар белгиланган. Қуйида уларни эътиборингизга ҳавола қиламиз.
Яқин қариндош билан бир жойда ишлаш ва тадбиркорликка чекловлар
Модданинг биринчи бандига кўра, давлат фуқаролик хизматчилари ўзаро яқин қариндошликда ёки қуда томондан қариндош бўлган шахслар билан айнан битта давлат органида бирга хизмат қилиши, улардан бирининг иккинчисига бевосита бўйсунишига ёки унинг назорати остида бўладиган давлат фуқаролик хизмати лавозимини эгаллаши ман этилади.
Шу билан бирга, педагогик, илмий ва ижодий фаолиятдан ташқари ҳақ тўланадиган бошқа фаолият билан шуғулланиш ҳам тақиқланади. Бунда Ўзбекистон қонунлари ҳамда президент қарорларида назарда тутилган ҳолатлар мустасно.
Модда билан давлат фуқаролик хизматчиси тадбиркорлик фаолияти билан шуғулланишига чеклов қўйилди. Агарда тадбиркорлик билан шуғулланиб келаётган шахс давлат фуқаролик хизматига қабул қилинса, тадбиркорлик фаолиятини тўхтатиши кераклиги белгиланди.
Шу билан бирга, тадбиркорлик фаолияти субъектларини ташкил этиш, уларнинг муассиси (иштирокчиси) бўлиш, тадбиркорлик фаолияти субъектида ташкилий-бошқарув, маъмурий-хўжалик вазифаларини бажариш ҳам мумкин эмас. Бундан акциядорлик жамиятларининг эркин муомалада бўлган акцияларига конунчиликда белгиланган талаблар доирасида эгалик қилиш ҳоллари мустасно.
Ноқонуний имтиёзлар ва совғалар олиш
Моддада давлат фуқаролик хизматчисининг ўз хизмат ваколатларини жисмоний ва юридик шахсларнинг манфаатларини кўзлаб бажариш ёки бажармаслик эвазига улардан бирон-бир мукофот, фойда ёки совғалар олиш тақиқланади.
Унга қонунчиликда назарда тутилмаган имтиёзлар, преференциялар ёки афзалликлардан ўз хизмат мавқейи билан боғлиқ ҳолда фойдаланишга ҳам мумкин эмас.
Хориж билан боғлиқ чекловлар
Модда билан давлат фуқаролик хизматчиси Ўзбекистон ҳудудидан ташқарида ҳисобварақлар очиши ва уларга эга бўлиши, кўчмас мулкка ва бошқа мол-мулкка эгалик қилиши ҳам тақиқланди. Бундан чет давлатда таълим олиш, стажировка ўташ ва тиббий хизматлардан фойдаланиш мақсадида очилган ҳисобварақлар, шунингдек, давлат фуқаролик хизматига киришдан олдин олинган ва ошкор қилинган мол-мулк мустасно.
Давлат фуқаролик хизматчиси чет давлат фуқаролигини олишга ҳам ҳақли эмас.
Қонунда белгиланишича, унга ўзи хизмат қилаётган давлат органи назорати остидаги ёки у билан алоқалар ва манфаатларга эга бўлган ташкилотлардаги улушларни, пайларни ва акцияларни бевосита ёки вакиллар орқали олиши ҳам ман этилади.
Шу билан бирга, давлат фуқаролик хизматчиси ўзининг ваколатларини сиёсий партиялар ва бошқа жамоат бирлашмалари, турли органларнинг манфаатларини кўзлаб амалга ошириши ҳам тақиқланади.
Қонун расмий эълон қилинган кундан 3 ой ўтгач кучга киради.
Изоҳ (0)