Xirurgiya markazida yil boshidan buyon qariyb 500 nafar bolada tug‘ma yurak nuqsoni jarrohlik yo‘li bilan davolandi. Bu haqda Sog‘liqni saqlash vazirligi matbuot xizmati xabar bermoqda.
Jahon sog‘liqni saqlash tashkiloti ma’lumotlariga qaraganda, sayyorada har yili 100 ming nafar chaqaloqdan 600—800 nafari tug‘ma yurak nuqsoni bilan dunyoga keladi. Qolaversa, mazkur xastalik kelib chiqishiga ko‘ra, nevrologik, tug‘ma nuqsonlar va suyak-mushak tizimi kasalliklaridan so‘ng uchinchi o‘rinda qayd etilgan. O‘z vaqtida zarur muolajalar qilinmasa, kasallik bola o‘limiga sabab bo‘lishi mumkin. Shu bois uni erta aniqlash, oldini olish va bemorlarning darddan forig‘ bo‘lishi uchun zarur shart-sharoitlar yaratish muhim hisoblanadi.
Bugungi kunda O‘zbekiston tibbiyotida ushbu xastalikni yangicha va zamonaviy davolash usullari amaliyotga joriy etilmoqda. Xususan, akademik V.Vohidov nomidagi respublika ixtisoslashtirilgan xirurgiya ilmiy-amaliy tibbiyot markazida mazkur yo‘nalishda bir qator noyob operatsiyalar o‘tkazilyapti.
Ayni paytda mamlakatda tug‘ma yurak nuqsoniga chalingan 4158 nafar bola bo‘lib, ular safiga har yili yana 600 nafar bemor qo‘shilmoqda. 2021-yil markazda yurak-qon tomir tizimining tug‘ma nuqsonlari bo‘lgan ana shunday bolalarda 620 ta, shu jumladan, 3 yoshgacha bo‘lgan o‘g‘il-qizlarda 194 ta murakkab jarrohlik amaliyoti muvaffaqiyatli amalga oshirildi.
Jahon miqyosida bunday operatsiyalar o‘ta murakkab hisoblanadi. Aytish kerak, 2022-yil yurtimizda mazkur amaliyotga bo‘lgan yuqori ehtiyoj tufayli markazda yangi — tug‘ma yurak nuqsonlari jarrohligi bo‘limi faoliyat boshladi. Bu esa joriy yilning o‘tgan davri davomida 497 ta ana shunday murakkab operatsiyani amalga oshirish imkonini berdi. Ulardan 60 nafari esa 3 yoshgacha bo‘lgan bolalardir, — deydi ushbu muassasa bo‘lim boshlig‘i, tibbiyot fanlari doktori Hakim Abrolov.Shuningdek, bu turdagi noyob amaliyotlarni nafaqat ushbu muassasada, balki hududlarda bajarishga ham alohida e’tibor qaratilyapti. Natijada 2021-yil viloyat markazlarida turli tug‘ma yurak nuqsonlari bo‘lgan bolalarda 53 ta jarrohlik operatsiyasi o‘tkazildi. 2022-yilning birinchi yarmida esa Qoraqalpog‘iston, Andijon, Surxondaryo, Buxoro hamda Samarqand viloyati markazlarida 35 ta bunday yuqori texnologiyali noyob muolaja bajarildi. Bu esa bolalarga kardioxirurgik yo‘nalishda sifatli tibbiy xizmat ko‘rsatish imkonini bermoqda.
Izoh (0)