Жорий йилнинг 8 август куни Сенатнинг Оролбўйи минтақасини ривожлантириш масалалари ва экология қўмитаси раиси Борий Алихонов раҳбарлигидаги ишчи гуруҳ Жиззах вилоятида атроф-муҳит мусаффолиги ва экологик барқарорликни таъминлаш, жумладан, «Яшил макон» умуммиллий лойиҳаси доирасида амалга оширилаётган ишлар, чиқиндиларни тўплаш, саралаш ва қайта ишлаш бўйича кўрилаётган чоралар, шунингдек, оқова сувларни тозалаш бўйича бажарилаётган ишлар билан танишди. Бу ҳақда Олий Мажлис Сенати хабар қилди.
Қайд этилишича, дастлаб вилоят ҳокимлигида ҳокимлик масъуллари, мутасадди корхона ва ташкилотлар вакиллари иштирокида Айдар-Арнасой кўллар тизимидаги муаммолар, чиқиндиларни қайта ишлаш ва утилизация қилиш ҳамда «Яшил макон» умуммиллий лойиҳаси бўйича учрашув ташкил этилган.
Шу куннинг ўзида вилоят экология бошқармасида Кореянинг «Techcross water&energy» компанияси вакиллари билан учрашув ўтказилган. Унда Жиззах шаҳрида ҳосил бўладиган оқова сувларни тозалаш масалалари муҳокама қилинган. Компания томонидан амалга оширилиши режалаштирилган қиймати 17 миллион доллар бўлган оқова сувларни тозалаш иншооти қурилиши юзасидан маълумоти тингланиб, тегишли таклиф ва тавсиялар берилган.
Шунингдек ишчи гуруҳ вакиллари Маиший чиқиндилар саралаш станцияда ташкил қилинган ишлар билан танишган.
Маълум бўлишича, полигонга Жиззах шаҳри ва учта тумандан кунига 400 тоннадан зиёд чиқинди олиб келинади. Сенатор сўзларига кўра, ҳозирги вақтда полигонда қарийб 3,5 миллион тонна чиқинди йиғилиб қолган. Полигонда чиқиндиларни жойлаштириш ва санитар талабларга риоя этиш етарли даражада йўлга қўйилмаган.
Бундан ташқари, ишчи гуруҳ вакилларининг заҳарли кимёвий воситалар чиқиндилари омбори масъуллари билан учрашуви ҳам ўтказилган. Суҳбат жараёнида заҳарли кимёвий моддаларнинг инсон соғлиғи ва атроф-муҳитга зарарли таъсирини бартараф этиш, жойлардаги заҳарли кимёвий ва бошқа токсик моддалар кўмилган ҳамда сақланаётган махсус объектларнинг хавфсиз ҳолатда сақланишини таъминлаш бўйича ишлар етарли даражада амалга оширилмагани қайд этиб ўтилган.
Дастлабки ўрганишлар якунида йўл қўйилган хато ва камчиликларни бартараф этиш бўйича масъулларга тегишли тавсия ва кўрсатмалар берилган. Ўрганишлар давом этмоқда.
Изоҳ (0)