O‘zbekistonda davlat tashkilotlarida ishlash uchun talabgorlar 50 barobar ortdi. Bu haqda AOKAda bo‘lib o‘tgan matbuot anjumanida Prezident huzuridagi davlat xizmatini rivojlantirish agentligi direktorining birinchi o‘rinbosari Otabek Hasanov ma’lum qildi, deya xabar bermoqda “Daryo” muxbiri.
Otabek Hasanovning aytishicha, hozirda bitta bo‘sh ish o‘rniga 50 kishi hujjat topshiradi va ularning 49 nafari o‘ta olmaydi.
“Avvallari bitta vakant joy bir kishiga to‘g‘ri kelardi va o‘sha odam ishga o‘tib ketardi. Endi bu vakant joy uchun ochiq tanlov o‘tkazilayotgani uchun institutni bitirgan 50 nafar yoshlar hujjat topishiryapti. Xalq bizdan professional xizmat so‘rayaptiku to‘g‘rimi? Davlat xizmatiga professional kadrlar kerak. Biz ham endi kadrlarni saralayapmiz. 50 kishidan 49 nafari ishga o‘ta olmayapti. Bundan keyin davlat xizmatiga kreativ, zamonaviy fikrlaydigan, professional kadrlar ochiq tanlov asosida ishga olinadi.
Davlat xizmatiga yoshlarning kirib kelishi 5 yil oldin 37 foiz edi. Hozir bu ko‘rsatgich 61 foizga chiqdi. Oddiy misol, 5 yil oldin 59 ming nafar odam oliy ta’limga ishga kirardi. Bugun 170 minga yaqin inson bu tizimga ishga kiryapti. Tasavvur qiling, davlat xizmatiga qancha ish kuchi kirib kelyapti? Ko‘pchilik davlat xizmatiga ishga kirish osonlashadimi deydi. Yo‘q. Endi davlat ishiga kirish qiyinlashadi”, — dedi agentlik rasmiysi.
Anjumanda Otabek Hasanov bugungi kunda qaysi davlat tashkilotida yoshlar ko‘proq ishlayotganini ham aytib o‘tdi.
“Davlat xizmatchilarining ko‘pchiligi yoshi kattalar degan tanqidlar bo‘ladi. Lekin nega yoshlarni kirib kelayotganiga e’tibor bermaymiz? Hozirda Yoshlar ishlari agentligi yosh xizmatchilari eng ko‘p davlat tashkilotdir. U yerda 9 ming 348 nafar davlat xizmatchilari ishlaydi. Bu yil davlat xizmatida yosh bo‘yicha o‘rtacha ko‘rsatgich 22–25 yosh orasida bo‘lmoqda. Ikkinchi o‘rinda hokim yordamchilari ichida yoshlar ko‘p”, — dedi agentlik vakili.
Izoh (0)