Ustiga benzin sepib, o‘zini yoqib yuborgan Farg‘onadagi zavod ishchisi vafot etdi

Farg‘ona neftni qayta ishlash zavodining ustiga benzin sepib, o‘zini yoqib yuborgan ishchisi vafot etdi, deya xabar berdi “Daryo” manbasi.

Qayd etilishicha, Sanobar Haydarova bugun, 10-avgust kuni soat 07:05 da Respublika shoshilinch tibbiy yordam ilmiy markazi Farg‘ona filialida vafot etgan.

Joriy yilning 2-avgust kuni Farg‘ona neftni qayta ishlash zavodi ishchisi ustiga benzin sepib, o‘zini yoqib yuborgani haqida xabar berilgan edi.

Keyinroq bosh prokuratura axborot xizmati rahbari Hayot Shamsutdinov holat yuzasidan Farg‘ona shahar prokuraturasi tomonidan tergovga qadar tekshiruv olib borilayotganini ma’lum qildi.

Shundan so‘ng, Farg‘ona neftni qayta ishlash zavodi tomonidan ushbu holat bilan bog‘liq qo‘shimcha ma’lumotlar ochiqlangan edi.

Sanobar Haydarova 2-avgust kunidan beri Respublika shoshilinch tibbiy yordam ilmiy markazi Farg‘ona filiali kombustiologiya bo‘limida davolanayotgan edi.