Farg‘ona neftni qayta ishlash zavodining ustiga benzin sepib, o‘zini yoqib yuborgan ishchisi vafot etgani haqida xabar berilgan edi.
Zavod ma’muriyati marhumaning dafn marosimi bilan bog‘liq barcha xarajatlari qoplanishi, jamoa shartnomasi asosida oila a’zolariga moddiy yordam ajratilishi, marhuma farzandlarining ta’lim olish va hayotda o‘z o‘rnini topishida amaliy yordam berilishini ma’lum qildi.
“2022-yil 10-avgust kuni hamkasbimiz, sobiq 32-sexning 1-ta’mirlash-qurilish uchastkasi bo‘yoqchisi Sanobarxon Haydarova og‘ir kuyish jarohati tufayli hayotdan ko‘z yumdi.
Sanobarxon Haydarova joriy yilning 2-avgust kuni ertalab soat 08:30 lar chamasida zavodning 1-sektoriga kirish yo‘lagida ustidan benzin quyib, olov yoqib, o‘z joniga qasd qilgan edi. Voqea joyida bo‘lgan xodimlarning tezkor harakatlari bilan olov darhol o‘chirildi. Unga zavod tibbiyot xodimlari tomonidan birinchi yordam ko‘rsatilib, korxona tez yordam avtomashinasida Respublika shoshilinch tibbiy yordam ilmiy markazi Farg‘ona filialiga yotqizildi.
Tibbiyot muassasasida og‘ir kuyish jarohatini olgan hamkasbimizga 2—10-avgust kunlari tezkor tibbiy muolajalar ko‘rsatildi. Kombustiologiya bo‘limi mudiri, davolovchi vrach D.Oripovning ma’lumotga ko‘ra, bemorga alangadan II – III AB darajali 70 foiz termik kuyishi, kuyish karaxtligi og‘ir daraja, yuqori nafas yo‘llarining I – II darajadan termik kuyishi tashxisi qo‘yilgan.
Davolash choralariga qaramay, 10-avgust kuni soat 07:00 larda bemorning umumiy ahvoli o‘ta og‘irlashdi, unda arterial qon bosimi va puls aniqlanmadi. Zudlik bilan reanimatsion chora-tadbirlar olib borildi, yurak yopiq usulda to‘g‘ridan-to‘g‘ri massaj qilindi.
Yuqorida ko‘rsatilgan yordamlarga qaramasdan bemorda klinik o‘lim yuz berdi. Reanimatsion yordamlar qayta-qayta o‘tkazilgan bo‘lsa-da, soat 07:05 da biologik o‘lim holati qayd etildi.
Bemorning o‘limiga tananing 70 foiz II – III AB darajali termik kuyishi, kuyish kasalligi toksemiya bosqichi sabab bo‘lgan.
Farg‘ona neftni qayta ishlash zavodi rahbariyati, birlashgan kasaba uyushmasi qo‘mitasi, jamoat tashkilotlari va ko‘p ming sonli jamoa a’zolari Sanobarxon Haydarovaning vafoti munosabati bilan uning oila a’zolari va yaqinlariga ta’ziya izhor qiladi.
Zavod marhumaning dafn marosimlarini o‘tkazish uchun bog‘liq barcha xarajatlari to‘liq qoplanishi, jamoa shartnoma asosida oila a’zolariga moddiy yordam ajratilishi, qaramog‘ida bo‘lgan balog‘at yoshidagi farzandlariga ta’lim olishida, hayotda o‘z o‘rnini topishida amaliy yordam berish vazifalarini o‘z zimmasiga oladi”, — deyiladi FNQZ ma’lumotida.
Eslatib o‘tamiz, avvalroq marhuma oilaning yagona boquvchisi ekani, turmush o‘rtog‘i ishsiz va 4 nafar qiz farzandi borligi ma’lum bo‘lgandi.
Izoh (0)