Ўзбекистонда давлат ташкилотларида ишлаётган ходимларнинг 5 фоизини пенсия ёшидагилар ташкил этади. Бу ҳақда АОКАда бўлиб ўтган матбуот анжуманида Давлат хизматини ривожлантириш агентлиги департамент мудири Алишер Эранов маълум қилди, дея хабар бермоқда «Дарё» мухбири.
Алишер Эрановнинг айтишича, салоҳиятли ходимлар пенсия ёшида ҳам давлат хизматида фаолият юритиши мумкин.
«Бугунги кунда давлат хизматида ишлаётганларнинг 61 фоизини 40 ёшгача бўлган ходимлар ташкил қилади. Пенсия ёшидагилар эса 5 фоиз. Қонунчиликда пенсия ёшида ҳам ишлаш ҳуқуқи берилган. Кадр пенсия ёшига етгандан кейин ишдан кетиши керак деган гап нотўғри. У малака талабларига жавоб беряптими, натижага эриша оляптими, замонавий фикрлашга эгами, давлат хизматида бемалол ишлаши мумкин. Бу нотўғри эмас»– деди агентлик вакили.
Аввалроқ давлат ташкилотларидаги вакант иш ўринларига бўлган талаб 50 баробарга ортгани маълум қилинганди.
«Авваллари битта вакант жой бир кишига тўғри келарди ва ўша одам ишга ўтиб кетарди. Энди бу вакант жой учун очиқ танлов ўтказилаётгани учун институтни битирган 50 нафар ёшлар ҳужжат топширяпти. Шундан 49 киши ишга ўта олмаяпти. Бундан кейин давлат хизматига креатив, замонавий фикрлайдиган, профессионал кадрлар очиқ танлов асосида ишга олинади», – дея таъкидлаган эди Давлат хизматини ривожлантириш агентлиги директори ўринбосари Отабек Ҳасанов.
Изоҳ (0)