Xorazmda Milliy gvardiyaga ishga kiritib qo‘yish uchun pul olayotgan shaxs qo‘lga tushdi

Xorazm va Andijon viloyatlarida ishga kiritib qo‘yishni va’da qilgan shaxslar ushlandi, deb xabar bermoqda Bosh prokuratura huzuridagi departament.

Departamentning Xorazm viloyat boshqarmasi tomonidan Milliy gvardiya va DXX xodimlari bilan hamkorlikda o‘tkazilgan tezkor tadbirda “Y” AJ inspektori M.P. fuqaro O.ni go‘yoki yuqori lavozimda ishlovchi tanishlari orqali Milliy gvardiya tizimiga ishga kiritib qo‘yishi evaziga 500 dollarni olgan vaqtida ashyoviy dalillar bilan ushlangan.

Shu kabi Andijon viloyatining Baliqchi tuman bo‘limi tomonidan o‘tkazilgan tergovga qadar tekshiruvda, fuqaro D.X. fuqaro A.ning ishonchiga kirib, uni “I.I.” MCHJga ishga kiritib qo‘yish evaziga 9 million so‘mini firibgarlik yo‘li bilan qo‘lga kiritgani aniqlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.