Andijon viloyatida kuchli ta’sir etuvchi dori vositalari oldi-sotdisi bilan bog‘liq yana bir holat aniqlandi. Bu haqda viloyat ichki ishlar boshqarmasi axborot xizmati xabar qildi.
Unga ko‘ra, 27-iyul kuni Andijon viloyati IIB JQB xodimlari tomonidan o‘tkazilgan tezkor tadbirlar natijasida Andijon tumanida yashovchi ayol Z.D. hamda uning sherigi — Andijon shahrida yashovchi ayol X.O. birgalikda jami 28 dona “Regapen” va 12 dona “Tropikamid” dori vositasini xolis xaridorga 2 million 500 ming so‘mga sotayotgan vaqtida tadbir ishtirokchilari tomonidan ushlangan.
Shuningdek, fuqaro Z.D.ning qo‘lida bo‘lgan sumkasida 68 dona “Regapen” hamda 6 dona “Tropikamid” kuchli ta’sir etuvchi dori vositasi borligi aniqlangan. Hozirda ushbu holat yuzasidan shahar IIO FMB tomonidan tergovga qadar surishtiruv ishlari olib borilmoqda.
Avvalroq ham Andijonda ayol 2800 dona kuchli ta’sir etuvchi dori saqlab yurgani aniqlangandi.
Izoh (0)