Toshkentning Sergeli, Yangihayot tumanlari va boshqa qator hududlarida noxush hidlarning paydo bo‘lishi sababli aholi noroziligi kuzatilgani sababli maxsus ishchi guruh “Salar” oqava suv tozalash inshootiga ishlab chiqarish bilan bog‘liq oqova suvlarini tashlayotgan korxonalarni o‘rgandi.
“Toshkent shahar suv ta’minoti” matbuot xizmatining ma’lum qilishicha, o‘rganishlar davomida inshootga yuqori ifloslangan, yoqimsiz va badbo‘y hidli oqova suv tashlashi ehtimoli bo‘lgan 30 ta korxona ro‘yxati shakllantirildi.
Ushbu korxonalar Sergeli, Yakkasaroy, Yashnobod, Mirobod, Mirzo Ulug‘bek va Yangihayot tumanlarida joylashgan. Ayni kunga qadar ishchi guruh tomonidan yuqoridagi korxonalardan 26 ta korxonaning oqova suv tarmog‘i va lokal tozalash inshooti texnologik holati o‘rganildi.
O‘rganishlar davomida 4 ta ishlab chiqarish korxonasida oqova suvlarini belgilangan me’yorlarga mutlaqo amal qilmayotganligi aniqlanib, “Kaya naturdarme” MCHJ , “Zamon” MCHJ, “Charm attor” MCHJ, “Xayk Paper” MCHJlar shahar oqova suv tamoqlaridan uzib qo‘yilgan.
Ta’kidlanishicha, barcha o‘rganilgan korxonalardan laboratoriya tahlillari uchun namunalar olindi. Me’yordan yuqori ifloslangan oqova suv uchun kompensatsiya to‘lovlari qo‘llanilmoqda. Korxonalar rahbarlari esa kelgusida belgilangan texnologik me’yorlarga to‘liq amal qilish bo‘yicha ogohlantirildi.
Izoh (0)