Andijonda fuqaroni katta pulga aldab ketgan Turkiya fuqarosiga nisbatan jinoiy ish ochildi

Andijon shahrida fuqaroni katta pulga chuv tushirib ketgan xorij fuqarosi qo‘lga olindi.

Aniqlanishicha, Namangan viloyati, To‘raqo‘rg‘on tumanida faoliyat ko‘rsatayotgan “Dilrabo SDA” ishlab chiqarish korxonasi rahbari M.S.ning juda ko‘p miqdordagi mablag‘larini B.S. aldov yo‘li bilan qo‘lga kiritgani haqidagi murojaati yuzasidan 2022-yil 22-fevralda Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilib, Andijon shahar IIO FMB huzuridagi Tergov bo‘limi tomonidan dastlabki tergov harakatlari olib borilgan.

Tergov davomida fuqaro B.S. ish bo‘yicha ayblanuvchi tariqasida ishtirok etishga jalb etilib, unga nisbatan “qamoq” ehtiyot chorasi qo‘llanilgan va jinoyat ishi ayblov xulosasi bilan 2022-yil 20-mayda jinoyat ishlari bo‘yicha Andijon shahar sudiga yuborilgan.

Sud tomonidan jinoyat ishi bo‘yicha tomonlarning iltimosnomasiga binoan dastlabki eshituv o‘tkazilib, jinoyat ishi Jinoyat-protsessual kodeksining 405-2-405-3-moddalari tartibida ayblov xulosasini tasdiqlagan Andijon shahar prokuroriga qaytarilgan.

Hozirda mazkur jinoyat ishi yuzasidan dastlabki tergov harakatlari olib borilmoqda.

Jinoyat ishi bo‘yicha tergov harakatlari viloyat prokuraturasi tomonidan nazoratga olindi.