Namanganda pochta tizimida yirik talon-torojliklar aniqlandi, deb xabar bermoqda O‘zA.
Ma’lum qilinishicha, DXX Namangan viloyati bo‘yicha boshqarmasi hamda Bosh prokuratura huzuridagi Iqtisodiy jinoyatlarga qarshi kurashish departamenti Namangan viloyati boshqarmasi hamkorligida surishtiruvlar olib borilgan.
Surishtiruvlar davomida “O‘zbekiston pochtasi” aksiyadorlik jamiyatining Namangan filiali Chortoq tumani pochta aloqa bog‘lamasi sobiq bosh hisobchisi T.N. (1975-yilda tug‘ilgan) va tashkilotning boshqa mansabdor shaxslari tomonidan 529 million so‘m pul mablag‘lari o‘zlashtirilgani aniqlangan.
Ular fuqarolarning aliment pullari, pochta xizmatlari ko‘rsatilishidan tushgan daromadlar, matbuot nashrlari obunasi va kommunal to‘lovlardan tushgan mablag‘larni o‘z shaxsiy plastik kartalariga noqonuniy ravishda o‘tkazish, konvert-marka mahsulotlarini noqonuniy sotish hamda ortiqcha ish haqlari hisoblash orqali juda ko‘p miqdordagi o‘zgalarning mablag‘larini o‘zlashtirish yo‘li bilan talon-toroj qilgan.
Hozirda T.N. va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Izoh (0)