O‘zbekistondagi jazoni ijro etish muassasalarida mehnatga jalb etilgan mahkumlarning koloniyalardagi ish stajini ularning umumiy mehnat stajiga qo‘shib hisoblash tartibi joriy etilmoqda. Bu haqda Oliy Majlis Qonunchilik palatasining 2-iyul kuni bo‘lib o‘tgan navbatdagi majlisida ma’lum qilindi.
Yalpi majlisda “O‘zbekiston Respublikasining ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan o‘zgartish va qo‘shimchalar kiritish to‘g‘risida”gi qonun loyihasi muhokama qilindi.
Ushbu hujjat ozodlikdan mahrum etishga hukm qilingan shaxslarga jazoni o‘tash sharoitlarini xalqaro standartlarga muvofiq takomillashtirish, mehnatga jalb etilgan mahkumlarning koloniyalardagi ish stajini umumiy mehnat stajiga qo‘shib hisoblash tartibini joriy etish hamda mahkumlarning tuzalish yo‘liga o‘tganini belgilovchi qat’iy mezonlarni belgilash maqsadida ishlab chiqilgan.
Qonun loyihasi bilan manzil-koloniyalarda O‘zbekistonning “Fuqarolarning davlat pensiya ta’minoti to‘g‘risida”gi, Soliq kodeksi hamda Jinoyat-ijroiya kodekslariga tegishli o‘zgartish va qo‘shimchalar kiritilmoqda. Ya’ni jazoni ijro etish muassasalarida jazo muddatini o‘tayotgan mahkumlarning, shu jumladan, nogironligi bo‘lgan mahkumlarning huquq doirasi kengaytirilib, xalqaro huquq normalari bilan muvofiqlashtirilmoqda.
Shu bilan birga, mahkumlarga rag‘batlantirish, muddatidan ilgari shartli ozod qilish va jazoni yengilrog‘i bilan almashtirish choralarini ko‘rish uchun asos bo‘ladigan mahkumning tuzalish yo‘liga o‘tganini baholovchi aniq mezonlar belgilanyapti.
Izoh (0)