Toshkentda ayol sobiq sevgilisi tomonidan tahdidlarga uchrayotganini ma’lum qilgandi. Poytaxt ichki ishlar bosh boshqarmasi holat yuzasidan rasmiy ma’lumot berdi.
Ta’kidlanishicha, ijtimoiy tarmoqlarda ayol kishi sobiq fuqaroviy turmush o‘rtog‘i tomonidan kaltaklangani haqidagi xabar tarqalib, ko‘plab muhokamalarga sabab bo‘lmoqda. Holat yuzasidan fuqaro G.M.ning murojaati asosida Yunusobod tumani IIO FMB tomonidan tergovga qadar tekshiruv o‘tkazilmoqda.
Tekshiruv jarayonida G.M.ning murojaatida ko‘rsatilgan barcha holatlar to‘liq o‘rganiladi va yakuni bo‘yicha qonuniy qaror qabul qiliniish ta’minlanadi.
Ayolning aytishicha, bu bo‘yicha huquqni muhofaza organlariga bir necha bor ariza bilan chiqqan, lekin erkakning katta joyda ishlaydigan tanishlari borligi uchun bu hech qanday natija bermagan.
Ma’lumot uchun, ayol quyidagicha murojaat yozib qoldirgan edi.
Kimga murojaat qilishni bilmay sizga (Nemolchi.uz’ga – tahr.) o‘zim bilan bo‘lgan voqeani aytmoqchiman. Men “Na Chile” restoranining egasi Oybek Isabayev Baxtiyarovich bilan fuqarolik nikohida edim. Mening undan 3 yoshli qizim bor. Shu yillar davomida ma’naviy va jismoniy zo‘ravonlikka duchor bo‘ldim, kaltaklandim, xo‘rlandim.
Lekin men undan uzoqlasha olmadim, chunki Oybek meni orqamdan tinmay ta’qib qilardi. Men bir necha marta IIBga murojaat qildim, lekin u hamma narsani pul va tanishlari bilan hal qildi.
Olti oy oldin biz alohida yashay boshladik, chunki u o‘ziga boshqa ayolni topib olgandi. Shundan so‘ng men bu odamdan qutuldim deb o‘ylagandim, xato o‘ylagan ekanman. Avvalgi zo‘ravonliklar battar yomonlashdi.
Bu erkak mashinamga GPS qo‘yib olib, ta’qib qiladi. Boshqa ayol bilan yashab, meni bolamning ko‘z o‘ngida kaltaklaydi, haqorat qiladi, xo‘rlaydi, mulkimni talon-toroj qiladi. U meni do‘q-po‘pisalar bilan manipulyatsiya qilib, o‘ldiraman, sochingni qirdiraman, deydi.
Menda sizlardan boshqa murojaat qiladigan boshqa hech kim yo‘q. Mening otam yo‘q, yordam beradigan biron tanishim yo‘q. Menga rahm qiladigan hech kim yo‘q... Hozir u meni qo‘rqitishda davom etmoqda. Kecha u mashinamni rasvo qildi, undan oldin telefonimni sindirib tashladi.
Men yolg‘iz onaman, onam va bolam bilan yashayman, oilamni o‘zim ta’minlayman. Kecha men IIB xodimiga ariza bilan murojaat qildim. Ammo haligacha hech kim menga qo‘ng‘iroq qilmadi. Iltimos yordam bering!” – deydi murojaatchi ayol.
Izoh (0)