O‘zbekiston va Ozarbayjon Toshkent shahrida zargarlik buyumlari ishlab chiqarish bo‘yicha qo‘shma korxona tashkil etishga kelishib oldi. Bu haqda Investitsiyalar va tashqi savdo vazirligi xabar berdi.
Ma’lum qilinishicha, 1-avgust kuni Toshkentda bosh vazir o‘rinbosari — investitsiyalar va tashqi savdo vaziri Jamshid Xojayev va Ozarbayjon iqtisodiyot vaziri Mikayil Jabbarov raisligida O‘zbekiston va Ozarbayjon o‘rtasidagi hamkorlik bo‘yicha hukumatlararo qo‘shma komissiyaning 11-yig‘ilishi bo‘lib o‘tdi.
Yig‘ilishda investitsiyaviy, sanoat, savdo-iqtisodiy, transport va logistika sohalarida hamkorlikni yanada rivojlantirish masalalari ko‘rib chiqildi va kelishib olindi.
Xususan, investitsiyaviy hamkorlik va sanoat kooperatsiyasi muhokamasi doirasida Bard shahri yaqinidagi 6 ta tumanda klasterini tashkil qilib, ipak ishlab chiqarishni yo‘lga qo‘yish, Yevlax pilot agroparki va Agdam sanoat parkida yangi loyihalarni ishlab chiqish, Toshkent shahrida zargarlik buyumlari ishlab chiqarish bo‘yicha qo‘shma korxona tashkil etish, kimyo sanoati, energetika, neft va gaz sohalarida hamkorlikni rivojlantirish kabi qo‘shma loyihalarni amalga oshirish bo‘yicha qator masalalar kelishib olindi.
O‘zaro savdoni jadallashtirish maqsadida O‘zbekiston—Ozarbayjon Ishbilarmonlar kengashi yillik yig‘ilishini va o‘zaro savdo missiyalarini o‘tkazish amaliyoti joriy etiladi.
Tomonlar 2022-yilning noyabrida Toshkent shahrida Hududlarning birinchi forumini, shuningdek, O‘zbekiston va Ozarbayjonning turli viloyatlaridagi ishlab chiqaruvchilar ko‘rgazmasini tashkil etishga kelishdi.
Shuningdek, transport-logistika salohiyatini ro‘yobga chiqarish doirasida Trans-Kaspiy yo‘nalishi bo‘yicha ikki tomonlama va tranzit tashish hajmini oshirish uchun qulay shart-sharoitlar yaratish bo‘yicha ishlarni davom ettirish, shuningdek, joriy yilning iyun oyida eng yuqori darajada imzolangan xalqaro avtomobil transporti shartnomasi doirasida ishlarni jadallashtirish zarurligi ta’kidlandi.
Uchrashuv davomida madaniy-gumanitar munosabatlar doirasidagi hamkorlik, ikki tomonlama turistlar oqimlarni oshirish va ta‘lim sohasida tajriba almashish, shu jumladan, ikki mamlakat universitetlari o‘rtasida to‘g‘ridan to‘g‘ri aloqalarni rivojlantirish masalalariga alohida ham e’tibor qaratilgan.
Izoh (0)