Вашингтон фақат фавқулодда ҳолатлардагина ядро қуролини қўллаши мумкин, дея маълум қилди АҚШ давлат котиби Энтони Блинкен БМТнинг Нью-Йоркдаги бош қароргоҳида бўлиб ўтган Ядро қуролини тарқатмаслик тўғрисидаги шартномага аъзо мамлакатлар конференциясида.
«АҚШ фавқулодда ҳолатлардагина, ўзининг, иттифоқдошлари ва шерикларининг ҳаётий муҳим манфаатларини ҳимоя қилиш учун ядро қуролидан фойдаланиш имкониятини кўриб чиққан бўларди», — деди Блинкен.
Унинг қайд этишича, АҚШ стратегик ядро кучларининг вазифаси Америкага, шунингдек, унинг иттифоқдошлари ва шерикларига ядровий ҳужумларни тийиб туришдан иборат.
Апрелда АҚШ Мудофаа вазирлиги Украинадаги жанговар ҳаракатлар туфайли ядро қуролидан фойдаланиш имкониятини муҳокама қилишни бошламаслигини маълум қилган эди. «Бундай гаплар хавфли ва фойда келтирмайди. Ҳеч ким кимдир ғалаба қозониши мумкин бўлмаган ядровий урушни хоҳламайди», — деган эди ўшанда Америка ҳарбий идораси раҳбари Ллойд Остин.
Айни вақтда Россия Хавфсизлик кенгаши раиси ўринбосари Дмитрий Медведев Украинага қурол-яроғлар юборилиши ва НАТОнинг Россия чегаралари яқинидаги ҳарбий машғулотлари Россиянинг альянс билан бевосита тўқнашиши хавфини ошириши, бундай вазият эса «тўла-тўкис ядровий уруш» таҳдидини яратиши ҳақида огоҳлантирган эди.
Унинг сўзларига изоҳ сифатида Кремль Украинадаги махсус операцияга аралашишга уринишларга «энг шиддатли жавоб» беришга Москва доим тайёр эканини қайд этганди. Президент матбуот котиби Дмитрий Песков эса махсус операциянинг ҳар қандай якуни ядро қуроли қўллаш учун сабаб бўлмаслигини таъкидлади.
Изоҳ (0)